माथिल्लो तामाकोसीको आठ महिनाभित्र परीक्षण उत्पादन

माथिल्लो तामाकोसी जलविद्युत् आयोजना निर्माणमा भइरहेको ढिलाइको अनिश्चितता अब भने हटेको छ । स्वदेशी लगानीमा निर्माणाधीन ४५६ मेगावाटको यो आयोजनाबाट आउँदो ८ महिनाभित्र परीक्षण उत्पादन हुनेगरी काम भइरहेको छ । माथिल्लो तामाकोसी जलविद्युत् आयोजना निर्माणमा भइरहेको ढिलाइको अनिश्चितता अब भने हटेको छ । स्वदेशी लगानीमा निर्माणाधीन ४५६ मेगावाटको यो आयोजनाबाट आउँदो ८ महिनाभित्र परीक्षण उत्पादन हुनेगरी काम भइरहेको छ । लामोसाँघु चरिकोट सडकको अवरोधका कारण आएको ढुवानी समस्या र भारतीय ठेकेदार कम्पनी टेक्सम्याकको कार्य सम्पादनमा आएको समस्याले पेनस्टक पाइप जडानमा ढिलाइ हुँदा आयोजनाको सम्पन्न हुने मितिमा देखिएको अनिश्चिता पनि हटेको हो । प्रवद्र्धक अपर तामाकोसी हाइड्रोपावर कम्पनीले सोही आयोेजनाको इलेक्ट्रोमेकानिकल कार्य गरिरहेको अष्ट्रियन ठेकेदार कम्पनी एन्ड्रिज हाइड्रोलाई तल्लो पेनस्टक जडानको काम दिएर काम सुरु गरेसँगै आयोजनाको निर्माण कार्यले लय लिएको छ । “यस प्रकारको उच्च हेड भएको आयोजनाको पेनस्टकको कार्य अति संवेदनशिल भएको पेनस्टककको जडानको क्रममा कार्य सम्पादनमा ठूलो समस्या देखिएको थियो, अहिले यसको समाधान भएर आयोजनाको सो कामले गति लिएको छ,” कम्पनीका प्रमुख कार्यकारी अधिकृत विज्ञान श्रेष्ठले भने, “पेनस्टक पाइप जडानतर्फ निकै अफ्ठेरो मानिएको ठाडो सुरुङको क्रेनलगायत पेनस्टक पाइप राख्ने सुचारु भएपछि आयोजनाको कामले गति लिएको छ ।”आयोजनाको बाँधस्थलबाट सुरुङमार्ग हुँदै पावरहाउससम्म पानी पेनस्टक पाइपबाट खसालिने भएपनि माथिल्लो र तल्लो पेनस्टक साफ्टको काम बल्ल अघि बढेको छ । ६ सय ८३ मिटर पाइप जडानको ठेक्का लिएको टेक्सम्यायोकोले ढिलाइ गरेपछि त्रिपक्षीय सम्झौतापछि यसमध्ये तल्लो पेनस्टकको ३ सय ७३ मिटर खण्डको जडान तथा ढुवानीको कार्य एन्ड्रिज हाइड्रोलाई जिम्मा दिइएको छ । आयोजनाले ३ सय १० मिटरको माथिल्लो पेनस्टकको काम भने टेक्सम्याकोले आफैं गर्ने जनाएको छ । चालू वर्षको हिउँदभित्रै निर्माण सम्पन्न हुने भनेपनि पेनस्टकको काममा ढिलाई हुँदा आयोजनाको निर्माण तालिका प्रभावित भइसकेको छ । “पेनस्टक निर्माण र यसको ढुवानीको काम दु्रतगतिमा अघि बढेकोले अबको आठ महिनाभित्र परीक्षण उत्पादन सुरु गर्ने लक्ष्य लिएको छ,” प्रमुख कार्यकारी अधिकृत श्रेष्ठले भने । आर्थिक बर्ष २०६७÷०६८ सालदेखि निर्माण सुरु भएको आयोजनाको हालसम्म ९७.९ प्रतिशत काम भने सम्पन्न भइसकेको छ । मुख्य सुरुङको निर्माण कार्य सम्पन्न भएको आयोजनाको मुख्य सुरुङको लाइनिङ कार्य ४६.३ प्रतिशत सम्पन्न भएको छ । विद्युत् गृहमा टर्वाइन जेनेरेटरको जडान कार्य ९५ प्रतिशत सम्पन्न भई सम्पूर्ण ६ वटै जेनेरेटर उपकरणहरूको ड्राइटेष्ट सम्पन्न गरिसकेको आयोजनामा सिन्धुपाल्चोकको खाडीचौरदेखि चरिकोटसम्मको सडक सुदुढीकरणको लागि आयोजनालाई आवश्यक पर्ने सामग्री लैजानका लागि समस्या देखिएको छ ।नेपाल विद्युत् प्राधिकरणको सहायक कम्पनीमार्फत निर्माण भइरहेको आयोजनामा विद्युत् प्राधिकरणको ४१ प्रतिशत, नेपाल दूरसञ्चार कम्पनीको ६ प्रतिशत, नागरिक लगानी कोष र राष्ट्रिय बिमा संस्थानको २÷२ प्रतिशत लगानी छ भने स्थानीय वासिन्दाको १० र सर्वसाधारणको १५ प्रतिशत सेयर छ । ऋणतर्फ पनि कर्मचारी सञ्चय कोष, राष्ट्रिय बिमा संस्थान, दुरसञ्चार कम्पनी लगायतले लगानी गरेका छन् । स्वदेशी लगानीमा निर्माण भइरहेको र राष्ट्रिय गौरवको आयोजनाको रुपमा घोषणा गरिएको आयोजना निर्माण सम्पन्न भएपछि समग्र अर्थतन्त्रमा ठूलो सरकारात्मक प्रभाव पार्ने, नेपालले विद्युत् निर्यात गर्न थाल्ने तथा पेट्रोलियम पदार्थको आयातलाई समेत घट्ने लक्ष्य सरकारले राखेको छ ।