प्रशारणलाइन र सवस्टेसनमा सवा ६ खर्ब लगानी «

प्रशारणलाइन र सवस्टेसनमा सवा ६ खर्ब लगानी

विद्युत् प्राधिकरणको १० वर्षे योजना
नेपाल विद्युत् प्राधिकरणले आगामी १० वर्षभित्र ६ खर्ब ३४ अर्ब ७० करोड ८० लाख रूपैयाँ बराबरको लगानी गर्ने योजना अघि सारेको छ । सरकारले आर्थिक वर्ष २०७५-७६ को बजेट तथा ऊर्जा, जलस्रोत तथा सिँचाइमन्त्री वर्षमान पुनले श्वेतपत्रमार्फत १० वर्षभित्र १५ हजार मेगावाट विद्युत् उत्पादन गर्ने लक्ष्य सार्वजनिक गरेपछि यसलाई लक्षित गर्दै प्राधिकरणले ठूलो लगानी गर्ने योजना अघि सारेको हो । चालू वर्षमा भने सरकारले प्रशारणलाइन र सवस्टेसनका लागि १४ अर्ब ७४ करोड रूपैयाँ बिनियोजन गरेको छ । प्राधिकरण प्रशारणलाइन निर्देशनालयका उपकार्यकारी निर्देशक बज्रभुषण चौधरीले प्रशारणलाइन निर्माणलाई जोड दिँदै प्राधिकरणले १० बर्षे योजना अघि बढाएको जानकारी दिए ।प्राधिकरणका अनुसार प्रशारणलाइन तथा सवस्टेसनका लागि एक वर्षभित्र २ अर्ब ४९ करोड, ३ वर्षभित्र ४५ अर्ब ९१ करोड, ५ वर्षभित्र ५० अर्ब ७५ करोड तथा १० वर्षभित्र ५ खर्ब ३९ अर्ब ५५ करोड ८० लाख बराबर लगानी गर्ने योजना छ ।  मुलुकभित्र १० हजार ९८ किलोमिटर र अन्तरदेशीय १ हजार ९ सय २ किलोमिटर गरी १२ हजार किलोमिटर प्रशारणलाइन बनाउने योजना राखेको प्राधिकरणले १० हजार ३ सय ३१ एमभीए सवस्टेसन निर्माण गर्ने योजना बनाएको छ । योजनाअनुसार एक वर्षभित्र मुलुकभित्रै ५ सय ३६ किलोमिटर र १ सय ३० किलोमिटर अन्तरदेशीय प्रशारणलाइन र १ हजार ३ सय ७४ एमभीए सवस्टेशन तथा तीन वर्षभित्र मुलुकभित्र २ हजार ५ सय ६९ किलोमिटर प्रशारणलाइन, अन्तरदेशीय ३३ किलोमिटर र ६ हजार ८७ सय १८ एमभीए सवस्टेशन निर्माण गर्ने लक्ष्य छ ।त्यसैगरी ५ वर्षभित्र मुलुकभित्र १ हजार ८ सय ३८ किलोमिटर र २ हजार १ सय ३९ एमभीए सवस्टेशन तथा १० वर्षभित्र ५ हजार १ सय ५५ किलोमिटर प्रशारणलाइन र १ हजार ७ सय ३९ किलोमिटर अन्तरदेशीय प्रशारणलाइन बनाउने प्राधिकरणले लक्ष्य लिएको छ । प्राधिकरणका अनुसार हाल ३ हजार ४ सय ६७ किलोमिटर प्रशारणलाइन मुलुकभित्र छ भने १ सय ३० किलोमिटर अन्तरदेशीय प्रशारणलाइन छ । ३ हजार १ सय ५५ एमभीए सवस्टेशन रहेको प्राधिकरणले जनाएको छ । प्राधिकरणका अनुसार हाल ४ सय केभीका एक प्रशारणलाइन र सवस्टेशन, २२० केभीका ५ प्रशारणलाइन र एक सवस्टेशन, १३२ केभीका २५ प्रशारणलाइन र ४ सवस्टेसन तथा ६६ केभीको एक प्रशारणलाइन आयोजनाहरू निर्माणाधीन छन् । कूल ३ हजार १ सय ३८ किलोमिटर प्रशारणलाइन र ६ हजार ८ सय १३ एमभीए सवस्टेसन निमार्णाधीन रहेको प्राधिकरणले जनाएको छ ।सन् २०२० भित्र सरकारले थप ३३ सय किलोमिटर प्रशारणलाइन बनाउने लक्ष्य राखे पनि पूरा गर्न कठिन देखिन्छ । तर, आगामी १० वर्षका लागि भने प्राधिकरणले ठूलो लगानीसहितको योजना अघि सारेको छ ।हाल ४०० केभीको ८० किलोमिटर मात्र प्रशारणलाइन रहेकोमा १० वर्षभित्र ७ हजार ५ सय ६६ किलोमिटर, ७५ किलोमिरट मात्र २२० केभी प्रशारणलाइन रहेकोमा १ हजार १ सय ७६ किलोमिटर र २ हजार ८ सय १९ किलोमिटर १३२ केभीको प्रशारणलाइन रहेकोमा ३ हजार १ सय २८ पु¥याउने लक्ष्य प्राधिकरणको छ । ४ सय ९३ किलोमिटर ६६ केभी प्रशारणलाइन रहेकोमा यसमा थप गर्ने लक्ष्य भने छैन । प्राधिकररणले १३२ केभी र यसमाथिका आयोजना मात्र निर्माण गर्ने योजना बनाएको छ । 


प्राधिकरणको लगानी योजना
वर्ष लगानी (अर्ब) प्रशारणलाइन (किलोमिटर) 
१ २.४९ ६६६
३ ४५.९१ २६०२
५ ५०.७५ १८३८
१० ५३९ ६८९४
स्रोत : नेपाल विद्युत् प्राधिकरण

प्रतिक्रिया दिनुहोस्