घरजग्गामा महिलाको स्वामित्व बढ्यो «

घरजग्गामा महिलाको स्वामित्व बढ्यो

सरकारले घरजग्गा पास गर्दा महिलालाई २५ प्रतिशत, एकल महिलालाई ३५ प्रतिशत, ज्येष्ठ नागरिकलाई २५ प्रतिशत, दलित तथा अपांगता भएकालाई २५ प्रतिशत रजिस्ट्रेसन शुल्क छुट दिँदै आएको छ ।

तेह्रथुम-सरकारले महिलाका नाममा घरजग्गा रजिस्ट्रेसन पास गर्दा २५ देखि ३५ प्रतिशतसम्म राजस्व छुट दिने व्यवस्था गरेपछि तेह्रथुममा घरजग्गा रजिस्ट्रेसन गर्ने महिलाको संख्या वृद्धि भएको छ ।
सरकारले घरजग्गा पास गर्दा महिलालाई २५ प्रतिशत, एकल महिलालाई ३५ प्रतिशत, ज्येष्ठ नागरिकलाई २५ प्रतिशत, दलित तथा अपांगता भएकालाई २५ प्रतिशत रजिस्ट्रेसन शुल्क छुट दिँदै आएको छ । राजस्व छुट हुँदा सर्वसाधारणले राहत पाउनुका साथै घरजग्गालगायतका अचल सम्पत्तिमा महिलाको स्वामित्वसमेत बढ्दै गएको छ ।
जिल्ला मालमोत कार्यालयका अनुसार विगत तीन वर्षयता मात्र जिल्लामा ९ सय ६९ जनाले महिलाको नाममा घरजग्गा पास गरेको निमित्त कार्यालय प्रमुख रमेश गौतमले बताए । “विगत चार/पाँच वर्ष अघिसम्म महिलाको नाममा घरजग्गा दर्ता गराउने विरलैमात्र भेटिन्थे,” प्रमुख गौतमले भने । पछिल्लो समय राजस्व छुट र सामाजिक चेतनासँगै आएको परिवर्तनले जिल्लामा महिलाको नामले घरजग्गा रजिस्ट्रेसन गराउनेको संख्यामा वृद्धि हुँदै गएको छ । यसले महिलाको आर्थिक तथा सम्पत्ति स्वामित्वमा वृद्धि गरेको रजिस्ट्रेसन फाँटकी प्रमुख रुकादेवी सुवेदी उप्रेतीले बताइन् ।
आर्थिक वर्ष २०७२/७३ मा ग्रामीण महिलाका नाममा ३ सय ३९ जना, शहरी महिलाका नाममा ३ सय ४, शहरी दलित ५, ग्रामिण दलित ९ जनाको नाममा लिखत पास भएको छ । त्यस्तै अपांगता शहरी २ र ग्रामीण ५ जनाको नाममा जग्गा पास भएको छ । जसबाट उनीहरूले १५ लाख १६ हजार ६४ रूपैयाँ राजस्व छुट पाएका छन् ।
आर्थिक वर्ष २०७३/७४ मा ग्रामीण महिलाका नाममा १ सय ८३ जना, शहरी महिलाका नाममा १ सय १९ जनाको नाममा घरजग्गा पास भएको छ भने दलित ग्रामीण ७, शहरी ४ र अपांगता १ र ज्येष्ठ नागरिक ३ जनाको नाममा लिखत पास भएको मालपोत कार्यालयले जनाएको छ । जसबाट उनीहरूले ५ लाख ४० हजार ८ सय ३ रूपैयाँ छुुट पाएका छन् ।
आव २०७४/७५ मा ग्रामीण महिलाका नाममा १ सय ११, शहरी महिलाका नाममा २ सय १७, दलित ग्रामीण १, शहरी १ र अपांगता भएका २ जनाको नाममा जग्गा पास भएको छ । जसबाट उनीहरूले ८ लाख ८० हजार ७ सय ७० रूपैयाँ छट पाएका छन् । यसरी तीन वर्षमा उनीहरूले २९ लाख ३७ हजार ६ सय ३७ रूपैयाँ छुट पाइसकेको कार्यालयले जनाएको छ ।
जिल्लामा एकल महिलाले अहिलेसम्म घरजग्गा पास नगरेको प्रमुख गौतमले बताए । सरकारले दलित र ७० वर्षमाथिका ज्येष्ठ नागरिकले पनि आफ्नो नाममा घरजग्गा पास गराएमा महिला सरह राजस्व छुट दिने व्यवस्था गरेको छ । आर्थिक वर्ष २०६५/६५ सालदेखि शेषपछिको वकसपत्र, दानपत्र र धितोबन्धकी बाहेकका महिलाको नाममा रजिस्टे«सन पास हुने घरजग्गामा सरकारले यस्तो सुविधा दिँदै आएको हो ।

प्रतिक्रिया दिनुहोस्