Logo

मुआब्जा रकम उत्पादनशील क्षेत्रमा लगाउन नपाएको दुःखेसो

अरुण तेस्रो परियोजना सञ्चालनका लागि अधिग्रहण गरिएको जग्गाको मुआब्जा प्राप्त गर्नेहरूले आफूले पाएको रकम उत्पादनशील क्षेत्रमा लगानी गर्ने वातावरण नपाएको गुनासो गरेका छन् । ९ सय मेगावाट क्षमताको अरुण तेस्रो परियोजना सञ्चालनका लागि संखुवासभाका २६९ जनाले गत वर्ष मुआब्जा लिएका थिए ।
परियोजना सञ्चालनका लागि नुम दोभानमा क्याम्पिङ, ड्यामसाइट निर्माण र पुखुवा पावरहाउससम्मका प्रभावितलाई उक्त रकम उपलब्ध गराइएको थियो । अरुण तेस्रो परियोजना सञ्चालनका लागि नुमको फ्याक्सिन्दामा ड्यामसाइट निर्माण गरी त्यहाँबाट सुरुङमार्ग हुँदै पुखुवा पावरहाउस अर्थात् विद्युत् उत्पादन गृहमा ल्याइने बताइएको छ ।
संखुवासभाको अरुण तेस्रो परियोजना सञ्चालन गर्न प्रभावित क्षेत्रका मकालु गाउँपालिकामा पर्ने नुम, पाथीभरा, याफु, चिचिला गाउँपालिकामा पर्ने, दिदिङको पुखुवालगायतका स्थानीय बासिन्दाहरूलाई क्षतिपूर्ति स्वरुप परियोजनाले मुआब्जा वितरण गरेको थियो ।
जग्गाधनीहरूको धनीपुर्जाका आधारमा उनीहरूलाई १ अर्ब १९ करोड २० लाख ४५ हजार ८६६ रुपैंयाँ जिल्लाका विभिन्न बैंकमा खाता खोली उपलब्ध गराइएको जिल्ला प्रसासन कार्यालय संखुवासभाले जनाएको छ । ठूलो रकम मुआब्जा पाएका कोही विस्थापित भई अन्य जिल्ला पुगेका छन् भने कोही पुँजी परिचालनसम्बन्धी आवश्यक जनचेतना अभावका कारण आफूले पाएको रकमको सही सदुपयोग गर्न सकेका छैनन् । मुआब्जाबाट प्राप्त रकम जिल्लाभित्रै परिचालन गर्न सके अलैंचीको मूल्यमा आएको ह्रास र रुद्राक्षको कारोबारमा आएको अस्थिरतालाई यसले केही हदसम्म न्यूनीकरण गर्न सकिने प्रमुख जिल्ला अधिकारी शिवराज जोशीको भनाइ छ ।
मुआब्जा पाउनेमध्ये केहीको बैंकमा रकम जम्मा रहेको भए पनि अधिकांशले घर घडेरीमा लगानी गरेका छन् । मुआब्जा स्वरुप प्राप्त रकम बचत गर्ने र सही ठाउँमा सुरक्षित सदुपयोग गराउने उद्देश्यले लगानी बोर्डले उनीहरूलाई ३ दिने तालिम तथा प्रशिक्षण कार्यक्रम उपलब्ध गराए पनि उक्त तालिम प्रभावकारी नभएको जनाइएको छ ।
मकालु गाउँपालिका– ५ नुमका रवी राई जिल्लामा लगानीको उपयुक्त क्षेत्र नभएको भन्दै काठमाडौँ मा घर बनाइरहेका छन् । आवश्यक लगानीको स्रोत पहिचान गर्न कठिनाइ भएकाले आफूजस्ता धेरै व्यक्ति काठमाडौँ , धरान, विराटनगर र तराईका अन्य जिल्लामा बसाइँ सराई गर्न बाध्य रहेको उनको भनाइ छ ।

प्रतिक्रिया दिनुहोस्