‘नगरकोटलाई जलाधार क्षेत्र घोषणा गर्नु पर्यो’
प्रकाशित मिति : भाद्र १४, २०७९ मंगलबार
नेपाल सरकार खानेपानी मन्त्रालयको आयोजनामा काठमाडौं उपत्यकाभित्रका सातवटा महानगर तथा नगर प्रमुखबीच ‘उपत्यकामा खानेपानी व्यवस्थापन एवं संस्थागत सबलीकरण’ विषयक छलफल कार्यक्रम सोमबार सम्पन्न भएको छ ।
कार्यक्रममा बोल्दै भक्तपुर नगरपालिकाका प्रमुख सुनिल प्रजापतिले मेलम्चीको पानी उपत्यकामा पठाउन ढिलाइ गर्न नहुने बताउँदै भक्तपुरको मुख्य पानीको स्रोत नगरकोटलाई सरकारले जलाधार क्षेत्र घोषणा गराई त्यस क्षेत्रको सुरक्षा र व्यवस्थापनको जिम्मा नेपाली सेनालाई दिनुपर्नेमा जोड दिए । उनले भक्तपुरका खानेपानीका पाइपलाइन निकै पुराना भइसकेको अवगत गराउँदै ती पाइपहरू फेर्नुको विकल्प नरहेको, ढल तथा खानेपानीको पाइपसँगै राख्नु नहुने र मेलम्चीको पानी नआउँदासम्मका लागि बोडेबाट आउने पानीको मात्रा बढाउनुपर्ने बताए ।
महादेव पोखरीमा ड्याम बनाउने कुरा छिटो छरितो ढंगले अगाडि बढाउनुपर्ने बताउँदै प्रमुख प्रजापतिले सिस्नेरी खानेपानी आयोजनालाई विकल्पको रूपमा विकास गर्नुपर्ने धारणा व्यक्त गरे । गोकर्णेश्वर नगरपालिकाका प्रमुख दिपककुमार रिसालले खानेपानीको स्रोत अभावलाई मन्त्रालयले वैकल्पिक उपाय अपनाएर समस्या समाधानतर्फ जोड दिनुपर्ने बताउँदै केयूकेयलले उपत्यकाको खानेपानी व्यवस्थापन र आपूर्तिमा क्रियाशीलता देखाउनुपर्ने बताए ।
खानेपानी मन्त्रालयका सचिव मणिराम गेलालले कार्यक्रमको उद्देश्यमाथि प्रष्ट पार्दै उपत्यकामा नयाँ बस्तीको विकाससँगै खानेपानीको समस्याले विकराल रूप लिँदै गएको बताए । उनले वर्षामा ठूलो पानी पर्दा मेलम्ची आयोजनामा क्षति पुर्याउने सम्भावना भएको हुँदा मेलम्चीको पानी पथान्तरणमा रोक लगाएको बताउँदै दसैं–तिहार पछाडि पुन: मेलम्चीको पानी उपत्यकामा वितरण गर्ने तयारीमा मन्त्रालय अगाडि बढिरहेको बताए ।
कार्यक्रममा काठमाडौं र ललितपुर महानगरपालिकाकातर्फबाट उपस्थित प्रतिनिधिले ललितपुरका धेरै क्षेत्रमा मेलम्चीको पाइप बिछ्याउन अझ पनि बाँकी रहेको हुँदा उक्त स्थानमा पाइप बिछ्याउनुपर्ने, मेलम्चीबाहेक अन्य खानेपानी स्रोतको पहिचान र संरक्षणमा जोड दिनुपर्नेमा उनीहरूको भनाइ थियो । इन्जिनियर महेश भट्टराईले ‘उपत्यकामा खानेपानी व्यवस्थापन एवं संस्थागत सबलीकरण’ गर्ने विषयमा प्रस्तुतीकरण गरेका थिए ।