बिजुली निर्यात गर्न सहज «

बिजुली निर्यात गर्न सहज


नेपाल र भारतीय पक्षबीच नेपालको पहिलो ४ सय केभी अन्तरदेशीय प्रसारण लाइनबाट ६ सय मेगावाटसम्म विद्युत निर्यात गर्न सकिने गरी सहमति भएको छ । नेपाल विद्युत प्राधिकरणले पहिलो ढल्केबर–मुजफरपुर अन्तरदेशीय प्रसारण लाइनबाट ३ सय ५० मेगावाटसम्म विद्युत आयात गर्न पाउने प्रावधान रहेकोमा अब भने ६ सय मेगावाटसम्म निर्यात र आयात गर्न पाउने सहमति भएको हो । सो प्रसारण लाइनको क्षमता एक हजार मेगावाट छ । तर अझै पूर्ण क्षमतामा सञ्चालन हुन सकेको छैन ।
नेपाल र भारतबीचको संयुक्त प्राविधिक समूह (जेटीजी) को सोमबार काठमाडांैमा बसेको बैठकमा सो सहमति भएको थियो । विद्युत विकास विभागका महानिर्देशक सञ्जीव देव र भारतीय ऊर्जा मन्त्रालयका सहसचिव रविन्द्र गुप्ताले नेतृत्व गरेको बैठकको सहमति सचिवस्तरीय संयुक्त कार्यकारिणी समिति (जेडब्लूसी) बाट पारित भएपछि कार्यान्वयनमा आउनेछ ।
विभागका महानिर्देशक देवले हालसम्म ३५० मेगावाटसम्म मात्र आयात गर्न पाउने प्रावधान रहेकोमा अब ६ सय मेगावाटसम्म आयात–निर्यात गर्न पाउने व्यवस्था हुनु ठूलो सफलता भएको बताए । बैठकमा १३२ केभीका बुटबल–न्यू नौतनवा र कोहलपुर–नानपारा प्रसारण लाइनको प्रगतिबारे समीक्षा भएको थियो । हाल निर्माणाधीन आयोजना सम्पन्न भएपछि यस क्षेत्रको उद्योगमा विद्युत आपूर्तिका लागि सहज हुनेछ ।

प्रतिक्रिया दिनुहोस्