म्याच प्रिभ्यू

पोर्चुगललाई हराउने इरानको दाउ
विश्वकप समूह चरणका अन्तिम खेल आज (सोमबार)बाट सुरु हुँदैछन् । समूह ‘बी’ मा रहेको इरानले समूह चरणको अन्तिम खेलमा पोर्चुगलसँग प्रतिस्पर्धा गर्दैछ । खेल नेपाली समय अनुसार राति ११ः४५ बजे सुरु हुनेछ । इरानले पहिलो खेलमा मोरक्कोलाई १–० ले हराएको थियो र दोस्रो खेलमा स्पेनसँग १–० ले पराजित भएको थियो । एक खेलमा जित निकालेर तीन अंक जोडेको इरान अघिल्लो चरणमा प्रवेश गर्न पोर्चुगल विरुद्ध स्पष्ट जित निकाल्ने अभियानमा हुनेछ । तर, उसका लागि पोर्चुगलका क्याप्टेन क्रिस्टियानो रोनाल्डोलाई रोक्नु निकै कठिन हुनेछ । रोनाल्डोले दुई खेलमा चार गोल गरिसकेका छन् ।
पोर्चुगलले पहिलो खेल स्पेनसँग ३–३ को बराबरी खेलेको थियो भने मोरक्कोलाई १–० ले हराएको थियो । एक बराबरी र एक जित निकालको स्पनेले चार अंक जोडेको छ । इरानविरुद्ध जित निकाल्दै समूह विजेता बन्ने दाउमा पोर्चुगल हुनेछ । यदी इरानसँग पराजित भएको खण्डमा उसको विश्वकप यात्रा समूह चरणमै अन्त्य हुनेछ, त्यसैले पनि पोर्चुगलले जित, अथवा बराबरीको नजिता निकाल्न आवश्यक छ । यद्यपी इरानको बलियो रक्षा पंक्ति तोड्न पोर्चुगलका लागि चुनौतिपूर्ण हुनेछ । इरानको रक्षापंक्ति तोड्न स्पेनलाई हम्मेहम्मे परेको थियो । इरानको बलियो रक्षा पंक्ति तोड्दै स्पेन विरुद्ध ह्याट्रिक गरेका रोनाल्डोलाई गोल गर्न त्यती सहज भने छैन ।
हेड टु हेडमा पोर्चुगलको शतप्रतिशत नतिजा
फिफा विश्व वरियतामा पोर्चुगल चौथो स्थानमा रहँदा इरान ३७ औं स्थानमा छ । अहिलेसम्म इरान र पोर्चुगलबीच दुई पटक भेट भएको छ र पोर्चुगलले शतप्रतिशत नतिजा निकाल्न सफल भएको छ । पोर्चुगलले इरानविरुद्ध पाँच गोल गरेको छ, इरानले भने पोर्चुगल विरुद्ध गोल गर्न सकेको छैन ।
२००६ को विश्वकपको समूह चरणमा इरान र पोर्चुगलबीच भेट भएको थियो । जुन खेल पोर्चुगलले २–० ले जितेको थियो र ८० औं मिनेटमा रोनाल्डोले पेनाल्टीमार्फत गोल गरेका थिए ।
सम्भावित लाइनअप
इरानः अली बेरानवन्द, एहसान हाजी सफी, मोर्टेजा पौरालिगनजी, रमिन रेजियन, मजिद होसेनानी, सेयद उजतोलाही, वाहिदी अमिरी, ओमिद इब्राहिमी, करिम अन्सारिफार्ड, मेहदी तारेमी, सरदार एजमन ।
पोर्चुगलः रुई पेट्रिसियो, पेपे, जोस फोन्टे, राफेल ग्वेरेरो, सेड्रिक सोरेस, विलियम कार्वाल्हो, जोओओ माउटिन्हो, बनार्ड सिल्भा, जाओ मारियो, गोन्कालो ग्यूडियस, क्रिस्टियानो रोनाल्डो ।
प्रेडिक्सनः ०–१ (पोर्चुगल)

मोरक्कोमाथि शानदार जित निकाल्ने स्पेनको धोको
निकै रोमान्चक समूह मध्येको एक समूह ‘बी’को अर्को खेलमा एक पटकको विश्वविजेता स्पेन मोरक्को माथि शानदार जित निकाल्ने अभियानमा हुनेछ । अंक तालिकामा पोर्चुगल र स्पेन दुवैको चार अंक छ । दुवै टोलीले तीन गोल खाएर चार गोल गरेका छन् । जसका कारण पनि स्पेन मोरक्कोलाई फराकिलो अन्तरले हराएर समूह विजेता बन्ने दाउमा हुनेछ ।
स्पनेले पहिलो खेल पोर्चुगलसँग ३–३ को बराबरी खेलेको थियो, भने दोस्रो खेलमा इरानलाई १–० ले हराएको थियो । इरान र स्पेनसँग पराजित भएको मोरक्कोले अंक जोड्न सकेको छैन र अन्तिम खेल अगावै घर फर्कने निश्चित भइसकेको छ । तर, पनि उ स्पेनलाई हराउँदै तीन अंक जोडेर घर फर्कने अभियानमा हुनेछ । तर, मोरक्कोको यो अभियान त्यती सहज भने हुँनेछैन । निकै सन्तुलित टिम, बलियो डिफेन्स र स्टार खेलाडीको बाहुल्यता रहेको स्पेन रसिया विश्वकपको बलियो उपाधि दावेदार हो । त्यसैले पनि मोरक्कोले स्पेनलाई हराउनु फलामको च्यूरा चपाए सरह हुनेछ ।
स्पेन पछिल्ला २२ खेलमा अपराजित छ । विश्वकप सुरु हुनुभन्दा दुई दिन अघिमात्रै प्रशिक्षक नियुक्त भएका फर्नान्डो हिएरो अपराजित कायमै राखेर उपाधि जित्ने अभियानमा छन् ।
विश्वस्तरीय प्रदर्शन गरे पनि मोरक्को यो विश्वकपमा अभागी सावित भयो, उसले दुई खेलमा १–१ गोलले हार व्यहोरेको छ । उसले स्पेन विरुद्ध रक्षा पंक्ति बलियो बनाएर मैदान उत्रन सक्छ । मोरक्कोले पछिल्ला १५ विश्वकप खेल मध्ये दुई खेलमा मात्रै जित हात पारेको छ । उसले जितेका दुवै खेल समूह चरणका अन्तिम खेल हुन् । उसले १९८६ मा पोर्चुगल विरुद्ध ३–१ को जित दर्ता गरेको थियो भने, १९९८ मा स्कटल्याण्डलाई ३–० ले हराएको थियो ।
स्पेनको शतप्रतिशत नतिजा
फिफा विश्व वरियतामा स्पेन १० औं नम्बरमा रहँदा मोरक्को ४१ औं नम्बरमा छ । दुई टोलीबीच अहिलेसम्म २ पटक भेट भएको र दुवै खेल स्पेनले जितेको छ । मोरक्को विरुद्ध स्पनेले ४ गोल गर्दा मोरक्कोले २ गोल गरेको छ ।
रसिया विश्वकप स्पेन सहभागी भएको १५ औं विश्वकप हो, उसले एक उपाधि समेत जितको छ । मोरक्कोले भने पाँचौ पटक विश्वकपमा सहभागित जनाएको हो ।
सम्भावित लाइनअप
स्पेनः डेभिड डि गे, जोर्डी अल्बा, सर्जियो रामोस, जेरार्ड पिके, डानी कार्भाजल, कोके, थियागो अलकान्तारा, इस्को, डेभिड सिल्भा, डिएगो कोस्टा, इगो एस्पस ।
मोरक्कोः मोरिन एल काजेइ, अचराफ हाकिमी, घनम सइस, मेहदी बेनातिया, हम्जा मेन्डेल, करिम एल अहमदी, हामिक जियाच, एमबार्क बोसोफा, यूनूस बेलहान्डा, नोर्डडाइन अमरावत, खालिद बोटाइब ।
प्रेडिक्सनः २–० (स्पेन)