महाअभियोग सिफारिस समितिको बैठक

महाअभियोग सिफारिस समितिले वरिष्ठ अधिवक्ताहरूसँग बयान लिएको छ ।
बिहीबार समितिले वरिष्ठ अधिवक्ताहरू चण्डेश्वर श्रेष्ठ, शम्भु थापा, ओमप्रकाश अर्याल, पूर्णमान शाक्य लगायतसँग बयान लिएको हो । महाअभियोग सिफारिस समितिले प्रधानन्यायाधीश चोलेन्द्र समशेर जबराले नाम लिएका वरिष्ठ अधिवक्ताहरूसँग आज बयान लिएको हो । बैठकमा आएर अधिवक्ताहरू प्रधानन्यायाधीश जबराले लगाएका आरोपको बयान दिएको समितिका प्रवक्ता लक्ष्मीप्रसाद गौतमले बताए । उनले शुक्रबार बस्ने बैठकमा प्रधानन्यायाधीश चोलेन्द्र समशेर जबरालाई पनि पूरक प्रश्नसमेतका लागि बोलाउने निर्णय भएको पनि बताए । उनले अहिले समितिले प्रतिवेदन लेख्ने काम गरिरहेको र प्रतिवेदनको बारेमा भोलिको बैठकले निर्णय गर्ने बताए ।
उनले भने, ‘आजको बैठकमा हामीले वरिष्ठ अधिवक्ताज्यूहरूले आएर यो विषयमा आफ्नो धारणा राखिसक्नुभएको छ । अर्को बैठक भोलि बिहान ९ बजे बस्ने र त्यसमा सम्माननीय प्रधानन्यायाधीश चोलेन्द्रशमशेर जबरालाई पनि पूरक प्रश्नसमेतका लागि बोलाउने निर्णय भएको छ । प्रतिवेदन लेख्ने काम भइरहेको छ । प्रतिवेदनको बारेमा भोलि निर्णय हुन्छ ।’
बैठकमा बयान दिएपछि वरिष्ठ अधिवक्ता पूर्णमान शाक्यले चोलेन्द्रशमशेर जबराबिरुद्ध यो महाअभियोगको प्रक्रियाको थालनीको लागि बारले खेलेको भूमिकाका बारेमा कसरी त्यस्तो परिस्थिति सिर्जना भयो भन्ने कुरा राखेको बताए । उनले यो बयानले महाअभियोगको प्रक्रियालाई अझै बल पुगेको महसुस भएको बताए । उनले समितिले आफूहरूसँग अझै प्रमाण भए त्यो पनि पेस गर्न भनेको बताए । उनले सके यही संसदबाट टुंगो लाग्नुपर्ने र प्रक्रिया नसके महाअभियोगको मुद्दा अर्को संसदले जिम्मेवारी लिनेगरी व्यवस्था गर्नुपर्ने बताए । उनले प्रधानन्यायाधीश जबराले महाअभियोगको स्पष्टीकरणका लागि दिएको मौकालाई दुरुपयोग गरेर आफूमाथि आरोप लगाएको बताए ।
उनले भने, ‘निलम्वित प्रधानन्यायाधीश चोलेन्द्रशमशेरले आफ्नो बयानको क्रममा जति पनि वरिष्ठ अधिवक्ता, बारका पदाधिकारी, पूर्वपदाधिकारी, बारेमा जुन कुरा उठाएका थिए, त्यसका सम्बन्धमा तपाईहरूको के भनाइ छ भन्ने कुरा सोध्नुभयो, हामीले आफ्ना कुरा प्रष्ट रुपमा राख्यौं । साथै चोलेन्द्रशमशेर जबराबिरुद्ध यो महाअभियोगको प्रक्रियाको थालनीको लागि बारले जुन भुमिका खेलेको थियो, त्यो बारको भुमिका खेल्नुपर्ने बाध्यता किन सिर्जना भयो भन्ने कुराको विस्तृत आधार कारणसहित प्रष्ट रूपमा राख्यौँ । यो सुनुवाइ महाअभियोगको प्रक्रियालाई अझै बल पुगेको महसुस भएको छ । थप प्रमाण भए दिन आग्रह गर्नुभएको छ, हामी थप प्रमाण उपलब्ध गराउँछौँ । महाअभियोगको सुनुवाई तथ्यपरक हुन्छ भन्नुभएको छ । अन्तर्राष्ट्रिय प्रचलन र मौजुदा कानूनले पनि सके यही संसदले टुंग्याउनुपर्ने हो, संसदले प्रक्रियालाई टुंग्याउन नसके विधि प्रक्रियाअनुसार आगामी संसदले जिम्मेवारी लिन्छ, यसमा दुविधामा बस्नुपर्ने अवस्था छैन । हाम्रो आरोप मात्रै होइन, तथ्यमा आधारित छ । फैसला ३ वटा बुझाएका छौँ । महाअभियोगको स्पष्टीकरणका लागि दिएको मौकालाई दुरुपयोग गरेर हामीमाथि आरोप लगाउनु भयो । विवादमा तान्ने प्रयास भएको छ । त्यो प्रयास कुनै पनि हालतमा स्वीकारयोग्य छैन । म माथि लगाएका आरोप निराधार छन् ।’
वरिष्ठ अधिवक्ता शाक्यले आफूमाथि लागेका आरोप निराधार रहेको उल्लेख गर्दे तत्कालीन समयमा न्यायका लागि संघर्षमा उत्रिएका कानुन व्यवसायीहरूलाई विवादमा तान्न प्रधान्यायाधीश जबराले आफूहरूको नाम लिएको बताए । महाअभियोग सिफारिस समितिको अर्को बैठक शुक्रबार बिहान ९ बजेका लागि बोलाइएको छ ।