नागरिकता विधेयकमा सबै दल एक हुनुपर्छ : खनाल «

नागरिकता विधेयकमा सबै दल एक हुनुपर्छ : खनाल

नेकपा (एकीकृत समाजवादी) का सम्मानित नेता तथा पूर्वप्रधानमन्त्री झलनाथ खनालले नागरिकता विधेयकमा सबै राजनीतिक दलको साझा धारणा हुनुपर्ने बताएका छन् । इलाममा सञ्चारकर्मीसँग कुरा गर्दै नेता खनालले संसद्मा बहुमत जुट्दैमा नागरिकता विधेयक पास गर्न नहुने बताए । राष्ट्रिय मुद्दामा सबै दलको साझा धारणा हुनुपर्ने उनको भनाइ छ ।
राष्ट्रपति विद्यादेवी भण्डारीले विधेयक प्रमाणीकरण नगरेकोमा आफ्नो यस विषयमा अध्ययन नभएको भन्दै उनले अध्ययन गरेर मात्र धारणा बनाउने बताए । नागरिकताको सवाल भनेको नेपालको राष्ट्रिय सहमतिको सवाल भएको भन्दै उनले अन्य विधेयक जस्तो नभएकाले यसलाई सामान्य रूपमा लिन नहुने बताए । उनले राष्ट्रिय सहमतिबिना विभिन्न ढंगबाट विधेयक पास गराउने काम नगर्न राजनीतिक दलहरूलाई सुझावसमेत दिए ।
जनसांख्यिक अतिक्रमणबाट हामी जोगिनुपर्ने भन्दै उनले एक/दुई वटा दलले मात्र सिंगो देशलाई समेट्ने कुरामा लाग्न नहुनेमा जोड दिए । फरक प्रसंगमा उनले आफू संघीय निर्वाचनमा इलामको निर्वाचन क्षेत्रबाट प्रत्यक्ष चुनाव लड्ने जानकारी दिए ।
अहिले बाम गठबन्धनको सम्भावना नभएको र शीर्ष नेताले बाम गठबन्धन नचाहेको उनको भनाइ थियो । नेता खनालले यसअघि स्थानीय चुनावमा पनि देशमा पाँच दलीय गठबन्धन भएको र अब पनि सोही गठबन्धनले निरन्तरता पाउने बताए । साना दलसँग छलफल भइरहेको भन्दै नेता खनालले सबैलाई समेट्ने गरी अघि बढ्ने पनि धारणा राखे ।

प्रतिक्रिया दिनुहोस्