घरायसी ग्राहकलाई हिउँद र वर्षाको विद्युतमा फरक महशुल «

घरायसी ग्राहकलाई हिउँद र वर्षाको विद्युतमा फरक महशुल

File Photos: THT

–२० युनिटसम्म घरायसी र सामुदायिकलाई निःशुल्क
–सिँचाइमा विशेष छुट

–उद्योगको न्यूनत्तम शुल्कमा वृद्धि
–अफ पिक समयको दर कम
–छुटबाट सवा खर्ब घाटा


नेपाल विद्युत प्राधिकरणले पहिलोपटक घरायसी ग्राहकलाई हिउँद र वर्षाको विद्युत महशुलमा फरक–फरक प्रस्ताव गरेको छ । बर्खायाममा खेर गइरहेको बिजुलीको उपयोग बढाउने उद्देश्यसहित वर्षामा सस्तो हुने गरी प्राधिकरणले विद्युत नियमन आयोगलाई विद्युत महशुलको प्रस्ताव गरेको हो ।
गार्हस्थ वर्गले गाउँमा व्यवसाय सञ्चालनका लागि ४ सय भोल्टको थ्री फेजको लाइनका लागि चार सय युनिटसम्म खपतमा प्रतियुनिट ११.५० र चार सय युनिटमाथि १२ रुपैयाँ रहेकोमा अब वर्षामा प्रति युनिट १०.५० र हिउँदमा ११.५० रुपैयाँ प्रस्ताव गरिएको प्राधिकरण स्रोतले जानकारी दिएको छ ।
प्राधिकरणले आयोगमा गरेको प्रस्तावमा २० युनिटसम्मलाई निःशुल्कका साथै सिँचाइका लागि हालको महशुल घटाइएको छ भने औद्योगिक ग्राहकलाई न्यूनत्तम शुल्क बढाइसकेको छ । महशुल घटाउँदा २० युनिटसम्म र सिँचाइका लागि गरी सवा खर्बबराबर घाटा लाग्ने अनुमान प्राधिकरणको छ । आयोगका सदस्य एवं प्रवक्ता डा. रामप्रसाद धितालले विद्युत प्राधिकरणबाट प्रस्ताव आएको र यसको वित्तीय विश्लेषण भइरहेको जानकारी दिए ।
१० युनिटम्म विद्युत उपयोग गर्ने घरायसी वर्गका ५ एम्पियरमार्फत लाइन लिने उपभोक्तालाई न्यूनतम शुल्क निःशुल्क रहेकोमा प्राधिकरणले २० युनिटसम्मका लागि निःशुल्क दिने प्रस्ताव गरेको छ । तर यस्ता ग्राहकले ऊर्जा शुल्क भने तिर्नुपर्छ । ऊर्जा शुल्क प्रति युनिट ३ रुपैयाँ छ । यसबाट २२ लाख ग्राहक लाभान्वित हुने र प्राधिकरणले ७५ करोड बराबर घाटा बेहोर्नुपर्ने प्राधिकरणको वित्तीय विश्लेषणमा उल्लेख छ । प्राधिकरणले २० युनिटसम्म खपत गर्ने सामुदायिक थोक ग्राहकको मशहुल दरमा समेत परिमार्जन गरी न्यूनतम शुल्कलाई निःशुल्क गर्न प्रस्ताव गरेको छ ।
गार्हस्थ वर्गले १५१ युनिटभन्दा बढी खपत गर्दा प्रति युनिट १० रुपैयाँ रहेकोमा ९.५० रुपैयाँ तथा ४ सय युनिटभन्दा माथिका ग्राहकको लागि प्रतियुनिट १२ रुपैयाँ रहेकोमा ११ रुपैयाँ प्रस्ताव गरिएको छ । विद्युतीय चुल्हो तथा विद्युतीय सवारी साधनको प्रवद्र्धनका लागि प्राधिकरणले यस्तो प्रस्ताव गरेको जनाएको छ । घरायसी तल्लो वर्गको २३०/४०० भोल्ट बिजुली उपयोग गर्ने ग्राहकको हकमा सिँचाइका लागि पानी तान्न हाल प्रति युनिट ४.३० रहेकोमा घटाएर २.२५ रुपैयाँ, ३३ केभीका ग्राहकका लागि पानी तान्न ४.८० रुपैयाँ रहेकोमा २.५० रुपैयाँ तथा ११ केभीका ग्राहकका लागि ४.९० रुपैयाँ रहेकोमा घटाएर २.६० रुपैयाँ कायम राख्न प्रस्ताव गरिएको छ । यसले कृषि उत्पादन वृद्धिमा सहयोग पुग्ने अपेक्षा गरिएको छ । यसबाट प्राधिकरणले करिब ५६ करोड घाटा हुने अनुमान गरेको छ ।
प्राधिकरणले औद्योगिक ग्राहकको हकमा न्यूनत्तम शुल्क वृद्धिको प्रस्ताव गरेको छ भने अफ पिक समयको विद्युत महशुल दर घटाउने प्रस्ताव गरेको छ । रात्री समय अर्थात् राती ११ बजेदेखि बिहान ५ बजेसम्मका लागि १३२ केभीको ग्राहकको हाल प्रति युनिट ४.६५ रुपैयाँ रहेकोमा घटाएर ४ रुपैयाँ, ६६ केभीमा ४.७५ रुपैयाँ रहेकोमा ४.०५ रुपैयाँ र ३३ केभीमा ३.१५ रुपैयाँबाट घटाएर ३ रुपैयाँ प्रस्ताव गरिएको प्राधिकरण स्रोतले जानकारी दिएको छ । सबै औद्योगिक ग्राहकको न्यूनतम शुल्क भने एक सय रुपैयाँ बढाउने प्रस्ताव गरिएको छ ।
विद्युत प्राधिकरणले घरायसी ग्राहकको महशुल घटाउँदा तथा औद्योगिकको न्यूनतम शुल्क बढाउँदा समग्रमा खासै महशुल नबढ्ने बताए पनि आयोगले भने यसको वित्तीय विश्लेषण भइरहेको जनाएको छ । “अहिले प्राधिकरणको प्रस्ताव अनुसार वित्तीय विश्लेषण भइरहेको छ, यो विश्लेषणपछि सुझावका लागि प्राधिकरणको प्रस्ताव सार्वजनिक गर्छौं,” आयोगका प्रवक्ता डा. धितालले भने, “सार्वजनिक सुनुवाई सकेर सबैको सल्लाह सुझावको आधारमा महशुलबारे निर्णय गर्छौ ।”
अघिल्लो वर्षको १ असारमा विद्युत नियमन आयोगले समग्रमा १० प्रतिशत विद्युत महशुल घटाएको थियो । गत वर्ष आयोगले दोब्बर महशुल कायम गरिएको ट्रंकलाइन र डेडिकेटेड फिडर नै खारेज गरिदिएको थियो ।

प्रतिक्रिया दिनुहोस्