कुलमानको कार्यकाल सकियो «

कुलमानको कार्यकाल सकियो


चार वर्ष अघि २९ भदौमा नेपाल विद्युत् प्राधिकरणको कार्यकारी निर्देशकमा नियुक्त भएका कुलमान घिसिङको कार्यकाल सकिएको छ । लोडसेडिङ अन्त्य गरेर चर्चामा आएका घिसिङको कार्यकाल आइतबारदेखि सकिएको हो । लोडसेडिङ अन्त्य गरेर जनतामाझ लोकप्रिय बनेका घिसिङलाई कार्यकारी निर्देशकका लागि निरन्तरताका लागि जनदबाब बढेको थियो तर आइतबारसम्म सरकारले उनलाई दोहो¥याउने वा अर्कै व्यक्तिलाई नियुक्त गर्ने भन्ने बारेमा कुनै निर्णय गरेको छैन । ऊर्जा, जलस्रोत तथा सिँचाइ मन्त्रालयका सचिव दिनेश घिमिरेले प्राधिकरणका कार्यकारी निर्देशक घिसिङको कार्यकाल सकिएको जानकारी दिए । “उहाँको कार्यकाल सकिएको छ, अब नयाँ प्रक्रिया अनुसार कार्यकारी निर्देशक छनोट हुनेछ,” सचिव घिमिरेले भने, “हालसम्म कसैलाई प्राधिकरणको निमित्त दिइएको छैन, सोमबार (आज) मन्त्रालयले आवश्यकता अनुसार तोक्छ ।”
सोमबारदेखि प्राधिकरणको नेतृत्व खाली भएकोले कसैलाई निमित्त दिनुपर्ने भए पनि आइतबार साँझसम्म दिइएको छैन । मन्त्रालयले भने सोमबार बिहान निमित्त दिने तयारी गरेको छ । निमित्तका लागि प्राधिकरणका उपकार्यकारी निर्देशकहरू पहिलो नम्बरमा रहेका हितेन्द्रदेव शाक्य, दोस्रो नम्बरमा रहेका लेखनाथ कोइराला र तेस्रो नम्बरमा रहेका हरराज न्यौपाने प्रतिस्पर्धामा छन् । सोमबार बस्ने मन्त्रिपरिषद्ले कुलमान घिसिङलाई नै पुनः नियुक्ति गर्ने चर्चा चलेपनि आइतबारसम्म भने यसबारे मन्त्रालयबाट कुनै प्रस्ताव गइसकेको छैन । “आइतबारसम्म घिसिङलाई पुनर्नियुक्तिका लागि प्रस्ताव गइसकेको छैन, सोमबार के हुन सक्छ भनेर भन्न सक्ने अवस्था छैन,” मन्त्रालयका एक अधिकारीले भने, “मन्त्रालयले प्राधिकरणका पहिलो नम्बरमा रहेका उपकार्यकारी निर्देशक शाक्यलाई बोलाएर छलफल गरेपनि पत्र भने दिईसकेको छैन ।”
सरकारले २०७३ भदौ २९ गते ४ वर्षका लागि नियुक्त गरेको थियो । चार वर्षअघिको लक्ष्मी पूजाको दिनदेखि सर्वसाधारणको घरमा रहेको लोडसेडिङ र २०७५ साल बैशाखदेखि औद्योगिक क्षेत्रमा समेत लोडसेडिङ अन्त्य गरेर उनी लोकप्रियताको शिखर चढेका थिए ।

प्रतिक्रिया दिनुहोस्