पाकिस्तानमा ग्यास चुहावट, ७० जना अस्पताल भर्ना «

पाकिस्तानमा ग्यास चुहावट, ७० जना अस्पताल भर्ना

इस्लामाबाद-पाकिस्तानको कराँचीस्थित कसिम क्षेत्रमा रासायनिक कारखानाबाट क्लोरिन ग्यास चुहावट भई ७० जना बिरामी परेका छन् । उनीहरू सबैलाई स्थानीय अस्पतालमा उपचारका लागि भर्ना गरिएको पाकिस्तानी सञ्चारमाध्यमले सम्बन्धित अधिकारीहरूलाई उद्र्धृत गर्दै जनाएका छन् ।
‘कारखानाबाट क्लोरिन चुहावट हुँदा कारखानामा कार्यरत ती कर्मचारी बिरामी परेका छन् । अहिले सावधानीका लागि कारखाना वरपरको प्रभावित क्षेत्रमा आवतजावतमा रोक लगाइएको छ,’ काराँचीस्थित एंगो पोलिमर तथा केमिकल प्लान्टद्वारा जारी विज्ञप्तिलाई पाकिस्तानी समाचार संस्था ‘डन’ले उद्धृत गरेको छ ।
ग्यास चुहावटलाई तत्काल नियन्त्रण गरिएको छ भने प्रभावित व्यक्तिलाई नजिकको अस्पतालमा लगी आवश्यक प्राथमिक उपचार सेवा दिइएको थियो । सबै बिरामी खतरामुक्त रहेको अस्पताल स्रोतले जनाएको छ ।
डनले भनेको छ, ‘घटनामा कुनै मानवीय क्षति भएको छैन । बिरामीहरू बेहोस हुने वा गम्भीर बिरामी भएको अवस्था छैन ।’
घटनापछि ७० जनालाई उपचार सेवा दिइएको र एक जनाको स्वास्थ्य अवस्था गम्भीर रहेको उपचार सेवा प्रवाह गरेको जिन्ना मेडिकल सेन्टरका कार्यकारी निर्देशक सिमन जमालीले बताए । यसबारे थप विवरण आउन बाँकी छ ।

प्रतिक्रिया दिनुहोस्