सुदूरपश्चिममा पानीको वितण्डा «

सुदूरपश्चिममा पानीको वितण्डा

आइतबार बेलुकादेखि भइरहेको वर्षाका कारण सुदूरपश्चिमका अधिकांश जिल्ला बस्तीहरू पहिरो र डुबानको चपेटमा परेका छन् ।
अविरल वर्षाका कारण महाकाली नदीमा पानीको सतह बढेपछि तटीय क्षेत्रका बस्ती डुबानमा परेका हुन् । महाकाली नदीको बाढी गाउँ पस्दा भीमदत्त नगरपालिका र दोधारा चाँदनीमा गरी १ सय ५० भन्दा बढी घर डुबानमा परेको प्रहरी जनाएको छ ।
भीमदत्त नगरपालिका वडा नम्बर ९, ११, १२ र १३ का खल्ला भुजेला ऐरी, ओदाली, बडैपुर, पिपरैयाका करिब १ सय घर र दोधारा चाँदनी नगरपालिका वडा नम्बर ८ सुन्दरनगर र वडा नम्बर १० को कुतियाकबर, शान्ती टोल तथा निसानी टोलमा गरी ६० घर डुबानमा परेको छ । महाकाली नदी तटीय क्षेत्रका बस्ती डुबानमा परेको जिल्ला प्रहरी कार्यालय कञ्चनपुरका प्रवक्ता सिद्धराज न्यौपानेले जानकारी दिए ।
ब्रह्मदेव बजारदेखि झोलुङ्गे पुलसम्म नदी किनारका बस्तीमा पानी पसेको र हालसम्म मानवीय क्षति नभएको उनले बताए ।
यस्तै कर्णाली नदीमा आएको बाढीले खतराको सतह नाघेको छ । चिसापानी बाढी मापन केन्द्रमा मंगलबार गरिएको मापनअनुसार नदीको सतह ११.३ मिटर नाघेको इलाका प्रहरी कार्यालय चिसापानी कैलालीले बताएको छ ।
कर्णालीमा १० मिटर पानीको सतहलाई सतर्कता र १०.८० मिटरलाई खतराको तह मानिन्छ । लगातारको वर्षाका कारण नदीमा पानीको सतह बढ्ने क्रम जारी रहेकोले खतरा अझै बढ्ने प्रहरीले बताएको छ ।
पानी अझै परिरहेकाले उद्धार र राहतमा कठिनाइ भएको छ ।

प्रतिक्रिया दिनुहोस्