एजेन्सी
मंगलबार, पुष २९, २०७६
561

बेइजिङ-ताइवान आफ्नै भएको पक्षमा परिवर्तन नगरिने बेइजिङले जनाएको छ । राष्ट्रपति साइ इङ–वेन पुनः निर्वाचित भएको र आफुले चीनको धम्की नमान्ने बताएपछि बेइजिङका तर्फबाट यस्तो भनाइ आएको हो ।
प्रजातान्त्रिक टापुलाई एक देशभित्रको दुई व्यवस्था स्वीकार गर्नका लागि भएको चिनियाँ प्रयासले वर्चस्व पाएको चुनावी अभियानका बावजुद वेनले विजयी भएकी हुन् ।

“ताइवानको आन्तरिक अवस्थामा जुन परिवर्तन भए पनि विश्वमा एकमात्र चीन रहेको छ र ताइवान चीनको हिस्सा भएको विषयमा परिवर्तन हुनेछैन,” चीनको विदेश मन्त्रालयले एक विज्ञप्तिमा जनाएको छ ।
चीनले ताइवान आफ्नै क्षेत्रको भएको बताए पनि ताइवानले आफु स्वतन्त्र मुलुक भएको र यसको औपचारिक नाम रिपब्लिक अफ चाइना भएको बताउँदै आएको छ ।
चीनको एक मुलुक दुई व्यवस्थाको मोडलको डटेर विरोध गर्दै आएकी साइले अर्को चारवर्षे कार्यकालका लागि अभूतपूर्व विजय हासिल गरेकि छन् । उनको डेमोक्र्याटिक प्रोग्रेसिभ पार्टीले संसदमा समेत बहुमत प्राप्त गरेको छ ।
“ताइवानी जनताले पुनः एक पटक मतदान गरेर विश्वलाई प्रजातन्त्रको मूल्य देखिाइदिएका छन्,” साइले भनिन् ।
“प्रजातन्त्र र स्वतन्त्रता वास्तवमै ताइवानको सर्वाधिक मूल्यवान सम्पत्ति हुन् र यो ताइवान–अमेरिकाको दीर्घकालीन साझेदारीको आधार हो,” ताइवानका लागि अमेरिकी राजदूतसँगको छलफलका क्रममा उनले बताइन् । उनले प्रतिरक्षादेखि अर्थतन्त्रसम्मको विषयमा अमेरिकासँगको सहकार्यलाई गहन बनाउने समेत बताएकी छन् ।
उनले शनिबार चीनसँगको वार्ता पुनः थाल्न आग्रह गरेकी थिइन् । तर बेइजिङले ताइवान र उसको जनतालाई बुझोस् र चेतावनीको कुरा नगरोस् भनेर बताएकी छन् ।
यद्यपि एक चीन नीतिको सिद्धान्त र ताइवानको स्वतन्त्रताको वोधको अडानमा चीनले कुनै परिवर्तन नगर्ने चीनको विदेश मन्त्रालयले जनाएको छ ।