एजेन्सी
सोमवार, मंसिर १६, २०७६
352

पेरिस-फ्रान्स, बेलायत र जर्मनीले इरानसँग वस्तु–विनिमयका आधारमा व्यापार गर्न ६ वटा नयाँ युरोपेली राष्ट्रले देखाएको तत्परतालाई शनिबार स्वागत गरेका छन् । हाल फ्रान्स, बेलायत र जर्मनीले इरानसँगको व्यापारका लागि वस्तु–विनियम प्रणाली स्थापना गरेका छन् ।
इरानविरुद्ध अमेरिकी आर्थिक प्रतिबन्ध रहेका कारण युरोपेली राष्ट्रहरूले अमेरिकी डलरको सट्टा वस्तु–विनिमयका आधारमा सीमित व्यापार गर्न चाहेका छन् ।

इन्स्टेक्स नाम दिइएको यस नयाँ व्यापार प्रणालीमा सहभागी हुन बेल्जियम, डेनमार्क, फिनल्यान्ड, नेदरल्यान्ड्स, नर्वे र स्वीडेनका सरकारहरूले सहमति जनाएका छन् ।
पेरिसस्थित मुख्यालय रहेको इन्स्टेक्सले इरानले आफ्नो तेल युरोपेली मुलुकलाई बेच्न सक्ने र त्यसको बदलामा युरोपेली मुलुकबाट सामान वा सेवाहरू खरिद गर्न सक्ने गरी क्लियरिङ एजेन्टका रूपमा कार्य गर्छ । हालसम्म यस प्रणालीमार्फत कारोबार हुन थालेको छैन ।
इरानसँग सन् २०१५ मा भएको बहुपक्षीय आणविक अप्रसार सन्धिबाट संयुक्त राज्य अमेरिका सन् २०१८ मा एकपक्षीय रूपमा हटेको थियो । इरानले सम्झौता बमोजिमका सर्तहरू पालना नगरेको आरोप लगाउँदै अमेरिकी ट्रम्प प्रशासनले इरानविरुद्ध कठोर आर्थिक प्रतिबन्धहरू लगाएको छ ।
फ्रान्स, जर्मनी र बेलायतका तर्फबाट जारी पछिल्लो संयुक्त विज्ञप्तिमा इन्स्टेक्समा नयाँ ६ वटा युरोपेली राष्ट्र जोडिएकोमा स्वागत गर्दै यसबाट इरानसँग युरोपेली मुलुकको व्यापारलाई सहजीकरण गर्न तथा इरानी आणविक कार्यक्रमलाई स्थगित राख्न ठूलो सहयोग पुग्ने विश्वास व्यक्त गरिएको छ ।
वक्तव्यमा इरानले पनि विगतको आणविक अप्रसार सन्धिबमोजिमका सर्तहरू पूर्ण पालना गर्नुपर्नेमा जोड दिइएको छ ।
उक्त सन्धिबाट अलग्गिएको अमेरिकाले आफूविरुद्ध आर्थिक नाकाबन्दी लगाएको भन्दै इरानले आणविक प्रशोधनका कार्यहरूलाई अघि बढाउने धम्की दिइरहेको छ ।