एजेन्सी
शुक्रवार, जेठ ३१, २०७६
379

जापानका प्रधानमन्त्री सिन्जो आबेले इरानका सर्वोच्च नेता आयातोल्लाह अलि खामेनीलाई बिहीबार इरानको राजधानी तेहरानमा भेट गरेका छन् ।
प्रधानमन्त्री आबे संयुक्त राज्य अमेरिका र इरानबीच जारी द्वन्द्व र तनावलाई मत्थर पार्ने उपायको खोजी गर्न इरानको भ्रमणमा रहेका छन् ।

प्रधानमन्त्री आबेको यो भ्रमण सन् १९७९ को इस्लामिक क्रान्तिपछि पहिलो पटक भएको हो ।
अमेरिकासँग अतिनिकट सम्बन्ध रहेको जापानको इरानसँग पारम्परिक सम्बन्ध रहिआएको छ ।
खामेनीको आधिकारिक ट्विटमा जापानका प्रधानमन्त्री सिन्जो आबेसँगको भेटवार्ताका तस्बिरहरू राखिएको छ ।
गत वर्ष मे महिनामा संयुक्त राज्य अमेरिकाले सन् २०१५ को ऐतिहासिक इरानी आणविक सम्झौता त्याग्ने घोषणा गरेपछि दुवै मुलुकबीचको सम्बन्ध चिसिएको छ । अमेरिकाले उक्त आणविक सम्झौताको आडमा आणविक हातहतियार निर्माणलाई गुप्त रूपमा विकास गरिरहेको आरोप लगाएको छ ।
हाल संयुक्त राज्य अमेरिकाले इरानमाथि कडा नाकाबन्दी घोषणा गर्नुका साथै सम्भावित इरानी आक्रमण भन्दै मध्यपूर्वमा सैनिक उपस्थिति बाक्लो बनाएको छ ।
अमेरिकी प्रतिबन्धसँगै इरानी खनिज तेलको बिक्री रोकिएको छ जसबाट भारत, चीन, जापानसमेतका प्रमुख तेल आयातकर्ता मुलुकहरूको अर्थतन्त्रमा नकारात्मक असर पर्ने अनुमान गरिएको छ ।
इरानले यमनका विद्रोही हुथी समूहलाई राजनीतिक, आर्थिक तथा हातहतियार उपलब्ध गराएको आरोपसमेत लाग्ने गरेको छ, जसलाई इरानले लगातार अस्वीकार गरिरहेको छ । हुथी विद्रोहीले छिमेकी मुलुक साउदी अरेबिया, युएई समेतका मुलुकमा ड्रोन र क्षेप्यास्त्र आक्रमण गरिरहेको आरोप लाग्दै आएको छ ।
जापानी प्रधानमन्त्री आबेले अहिले मध्यपूर्वका मुलुकहरूमा तनाव बढ्दै गएको र भीषण द्वन्द्व कुनै पनि समय सुरु हुन सक्ने बताएका छन् । उनले सशस्त्र युद्धको अवस्था आउन दिनु नहुने बताए ।
प्रधानमन्त्री आबेले जापानले तनाव न्यून गर्न सबै प्रयास गर्ने बताउँदै यही एक मात्र उद्देश्यका साथ आफू इरान आइपुगेको बताए ।
तेहरानमा आयोजित पत्रकार सम्मेलनमा इरानी राष्ट्रपति रौहानीले संयुक्त राज्य अमेरिकाले इरानमाथि आर्थिक नाकाबन्दीजस्तो दबाब रोके मध्यपूर्वमा सकारात्मक परिवर्तनको सम्भावना धेरै रहेको बताए ।
उनले अमेरिकाले इरानमाथि सैनिक हस्तक्षेत्र गरेमा त्यसको उचित जवाफ दिइने चेतावनी पनि दिए ।