एजेन्सी
बुधवार, जेठ २९, २०७६
201

नामिबियामा हुन लागेको राष्ट्रपति निर्वाचनमा मतदान गर्न ४३ वर्षीया सेलिया काधिक्वा निकै व्यग्रताका साथ प्रतीक्षा गरिरहेकी छिन् ।
तेस्रो पटक मतदान गर्न लागेकी सेलियाले पहिलो पटक मतदानको आवश्यकता र अर्थ बुझ्न थालेकी हुन् । सेलियाझैं नामिबियाका हजारौं महिलाले यसपटक लैंगिक समानता र राजनीतिमा महिला सहभागिताको महŒवबारे बुझ्न तालिम लिइरहेका छन् ।

सेलियाले भनिन्, “विगतमा खासै केही नबुझी त्यसै मतदान गरेर फर्कन्थें । अहिले मतदान र राजनीतिका बारेमा मेरो विचार भिन्न छ ।”
सन् २०३० भित्र दिगो विकासको लक्ष्यबमोजिम लैंगिक समानता हासिल गर्न नामिबियाले महिलाहरूलाई प्रशिक्षण दिइरहेको छ ।
“अब क्षेत्रीय परिषद् निर्वाचनमा म पनि उम्मेदवार हुन सक्छु कि भन्ने आँट पलाएको छ,” सेलियाले ठट्यौली गर्दै भनिन् ।
नामिबियाको राष्ट्रिय लैंगिक नीति दस्तावेजका अनुसार नामिबियाले राजनीतिक नेतृत्वमा महिलाको प्रतिनिधित्व गराउने सन्दर्भमा ठोस प्रगति गर्न सकेको छैन ।
अध्ययनहरूले नामिबियाको राष्ट्रिय परिषद्मा महिलाको प्रतिनिधित्व पुरुषहरूको दाँजोमा ज्यादै न्यून रहेको देखाएका छन् । हाल, नामिबियाको क्षेत्रीय परिषदमा महिलाको प्रतिनिधित्व १४ प्रतिशत र मन्त्रिपरिषद्मा २२ प्रतिशत मात्र छ ।
महिला विकास कार्यसमूहका कार्यकारी निर्देशक सालाटियाल शिनेडिमाले तालिमको मुख्य उद्देश्य नै महिलालाई सीप र ज्ञानबाट सुसज्जित गर्नु रहेको बताइन् । मतदाता वा उम्मेदवार जुनसुकै अवस्थामा पनि महिलाको निर्णय क्षमता विकास गर्न आफ्नो संस्थाले देशैभर प्रशिक्षण चलाइरहेको उनले भनिन् ।
नामिबियास्थित राष्ट्रसंघीय कार्यालयका अनुसार सहरी क्षेत्रमा भन्दा ग्रामीण इलाकामा महिलाको अवस्था अझ कमजोर रहेको छ । महिलाले आफ्ना हक अधिकारको पूर्ण रूपमा उपयोग गर्न निकै कठिन रहेको अध्ययनले देखाएको छ ।