एजेन्सी
शुक्रवार, जेठ १०, २०७६
220

भारतको तल्लो सदन लोकसभाका लागि भएको निर्वाचनको बिहीबार साँझ ६ः३० बजेसम्मको मत गणना अनुसार भारतीय जनता पार्टीलाई अत्यधिक बहुमत आउने प्रस्ट सङ्केत देखिएको छ ।
बिहीबार बिहानदेखि मत मतगणनाअनुसार सत्तारूढ भारतीय जनता पार्टीले १५ सिटमा बिजय हासिल गरिसकेको छ । भाजपा अन्य २ सय ८८ स्थानमा अग्रता कायम गरेको भारतीय निर्वाचन आयोगले जनाएको छ ।

त्यसैगरी प्रमुख प्रतिपक्षी भारतीय कंग्रेसले दुई स्थानमा विजय हासिल गरेको छ भने ५३ स्थानमा अग्रता कायम गरेको छ ।
भाजपा गठबन्धन नेसनल डेमोक्रेटिक अलाएन्स (एनडीए) ले ३४६ स्थानमा अग्रता कायम गरेको छ भने कंग्रेस आई निकट युनाइटेड प्रोग्रेसिभ अलाएन्स (यूपीए) को ९४ स्थानमा अग्रता कायम छ । अन्य १ सय २ स्थानमा अन्य साना तथा क्षेत्रीय दलको अग्रता छ ।
भाजपाले बहुमत आउने भएपछि प्रधानमन्त्री नरेन्द्र मोदीलाई आगामी प्रधानमन्त्रीका रूपमा हेरिएको छ । उनको गठबन्धनले अत्यधिक बहुमत स्थानमा अग्रता कायम गरेपछि उनलाई नेपालका प्रधानमन्त्री केपी शर्मा ओली, पाकिस्तानी प्रधानमन्त्री इमरान खान, इजरायली प्रधानमन्त्री बेन्जामिन नेतन्याहु लगायतले बधाई ज्ञापन गरेका समाचारहरू भारतीय सञ्चारमाध्यमले प्रसारण गरेका छन् ।
भारतीय प्रधानमन्त्री नरेन्द्र मोदीले आफू, आफ्नो दल र आफू नेतृत्वको गठबन्धनलाई मतदान गरी विजयी गराउने भारतीय समर्थक, शुभचिन्तक, कार्यकर्ता तथा जितका लागि अनवरत लाग्ने नेतृत्वलाई बधाई दिएका छन् ।
उनले निर्वाचनका लागि तय गरेको नारा सबको साथ, सबको विकास, सबको विश्वासको निष्कर्ष समग्र भारत र भारतीयहरूको विजय भन्ने वाक्यांश दोहोराउँदै भाजपाले आगामी दिनमा सबैलाई विश्वासमा लिएर अघि बढ्ने बताएका छन् ।
कंग्रेस नेता राहुल गान्धीले भारती प्रधानमन्त्री नरेन्द्र मोदीलाई निर्वाचनमा पाएको सफलताका लागि बधाई दिएका छन् ।
निर्वाचन परिणाम कंग्रेसका लागि अनपेक्षित रहेको भए पनि कंग्रेसका शुभचिन्तकलाई नआत्तिन राहुल गान्धीले एक पत्रकार सम्मेलनमार्फत् आग्रह गर्नुभएको छ । उनले यस पहिल (सन् २०१४) मा करिब एक लाख मतका साथ विजय हासिल गरेको अमेठी निर्वाचन क्षेत्रमा आफ्नो हार स्वीकार गर्नुभएको छ । यद्यपि मतगणनाको अन्तिम परिणाम भने आइसकेको छैन । उक्त क्षेत्रमा प्रतिस्पर्धामा रहेकी विजेपी नेता स्मृति इरानीलाई मतगणनाको अन्तिम परिणाम आउनुपूर्व नै गान्धीले बधाई दिएका छन् ।
त्यसैगरी गान्धीले निर्वाचनमा कंग्रेसको अपेक्षाकृत नतिजा नआएको भन्दै हारको जिम्मा पार्टीको अध्यक्षका हैसियतले आफूले लिने बताएका छन् ।
भाजपाले कमजोर प्रदर्शन गर्ने अपेक्षा गरिएका उत्तर प्रदेश, मध्यप्रदेश, राजस्थानजस्ता केही राज्यमा पनि भाजपाले नै अग्रता कायम गरेको छ । भाजपाले पश्चिम बंगालमा व्यापक सुधार देखिएको छ
पाँच सय ४५ सदस्यीय भारतीय लोकसभामा ५४३ स्थानका लागि चुनाव भएको थियो । दुई स्थान राष्ट्रपतिले चयन गर्ने भारतीय संवैधानिक प्रावधान छ ।
लोकसभाका साथै उडिसा, आन्ध्र प्रदेश, सिक्किम र अरुणाचल प्रदेशको विधानसभाका लागि पनि चुनाव भएको थियो । अप्रिल ११ मा सुरु भएको निर्वाचन विभिन्न सात चरणमा गरी मे १९ मा सम्पन्न भएको थियो । चुनावको नतिजा आजै सार्वजनिक गर्ने गरी भारतीय निर्वाचन आयोगले तयारी गरेको छ ।