एजेन्सी
आइतवार, फाल्गुन २६, २०७५
1390

हेल्सिन्की-फिनइस्ट बे एरियाले फिनल्यान्डको राजधानी हेल्सिन्की र इस्टोनियाको राजधानी टाल्लिन जोड्ने रेलका लागि समुद्रमुनि सुरुङ बनाउन चीनको टचस्टोन क्यापिटल पार्टनर्ससँग वित्तीय सम्झौता भएको जनाएको छ ।
सुरुङ निर्माणका लागि टचस्टोनले १६ अर्ब ८० करोड डलर (१५ अर्ब युरो) उपलब्ध गराउने समझदारी पत्रमा हस्ताक्षर भएको छ ।

कुल लगानीको एकतिहाइ हिस्सा निजी क्षेत्रले लगानी गर्नेछ । दुईतिहाइ हिस्सा भने ऋण लगानी हुनेछ ।
“विस्तृत वित्तीय विवरणमा आगामी ६ महिनाभित्रै सहमति जुटाइनेछ,” फिनइस्टले जारी गरेको विज्ञप्तिमा उल्लेख छ । फिनइस्टले सुरुङ निर्माणका लागि सुरुमा करिब १५ देखि २० अर्ब युरो लाग्ने अनुमान गरेको थियो ।
फिनइस्टले डिसेम्बर २०१८ मा दुबईस्थित निर्माण कम्पनी एआरजे होल्डिङबाट १० करोड डलर प्राप्त गरेको थियो भने युरोपेली लगानीकर्ताका निम्ति पनि बाटो खुला गरिएको छ । “अब वित्तीय स्रोत जुटेको छ, काम अघि बढ्छ,” परियोजनाका नेतृत्वकर्ता पिटर भस्टरबाकाले बताए ।
फिनल्यान्ड र इस्टोनियाले वर्षौंदेखि दुई देशबीचको राजधानीलाई जोड्ने प्रयत्न गरेका थिए । यी दुई राजधानीलाई गल्फ अफ फिनल्यान्डले छुट्याएको छ ।
दसौं हजार इस्टोनियालीहरू हेल्सिन्कीमा काम गर्छन् । उनीहरूलाई सप्ताहन्तमा घर जान समुद्री मार्ग प्रयोग गर्नुपर्छ । फिनिस नागरिकका लागि टाल्लिन एउटा निकै लोकप्रिय गन्तव्य पनि हो । सुरुङ निर्माणबाट यात्रा समय करिब २० मिनेट मात्र हुनेछ जबकि हाल फेरिबाट यात्रा गर्दा दुई घण्टाभन्दा बढी लाग्ने गरेको छ । दुवै मुलुकबाट गरिएको सम्भाव्यता अध्ययनमा करिब १ सय किलोमिटर लामो यो सुरुङ सन् २०४० सम्ममा निर्माण सम्पन्न हुने जनाइएको थियो । तर, भस्टरबाकाले सुरुङ निर्माण कार्य सन् २०२४ भित्रै सम्पन्न गरिने प्रतिबद्धता व्यक्त गरे ।
यो परियोजनालाई दुबै मुलुक र युरोपेली युनियनबाट पूर्ण समर्थन प्राप्त भइसकेको छैन ।
फिनल्यान्डकी प्रधानमन्त्री जुहा सिपिलाले यसै साता इस्टोनिया भ्रमणका क्रममा सुरुङ मार्गबाट दुई देश चाँडै जोडिने बताएकी थिइन् ।