कारोबार संवाददाता
बुधवार, चैत्र २१, २०७४
3746

औद्योगिक घराना तथा सम्पन्न वर्गहरूका लागि सुविधासम्पन्न आवासीय घरहरूको माग बढिरहेको बेला शालिमार ग्रुपले वीरगन्जमा निर्माण गरेको आवासीय योजना शालिमार होम्सको बिक्री खुला गरेको छ । शालिमार समूहले एक अर्बभन्दा बढी लगानीमा निर्माण गरिएको शालिमार होम्स प्रालिको चैत १५ गते बिहीबार प्रदेश नम्बर २ का मुख्यमन्त्री लालबाबु राउतले रिबन काटेर अपार्टमेन्टको उद्घाटन गरेपछि औपचारिक रूपमा बिक्री खुला भरएको हो । 
सन् २०१३ देखि निर्माण सुरु गरेको आवासीय योजनामा अहिले ब्लक ‘ए’ र ब्लक ‘बी’ गरी दुइटा अपार्टमेन्टमा ४५ वटा अपार्टमेन्ट बिक्रीका लागि तयारी अवस्थामा रहेको समूहका उपाध्यक्ष अशोकुमार वैदले बताए । बिक्री सुरु गरेको पहिलो दिन १५ वटा अपार्टमेन्ट बुकिङ भएको छ । वीरगन्जको मुख्य सडकबाट नजिक रहेको अपार्टमेन्टबाट होटल, बैंक तथा बजारहरू पनि नजिक रहेकाले सबैको रोजाई बन्ने शालिमार समूहको दाबी छ । यो संरचनामा पर्याप्त पार्किङ, पौडीपोखरी, चौविसै घण्टा बिजुलीको आपूर्ति, सुरक्षाका लागि सीसीटिभी क्यामराको निगरानी र सुरक्षा गार्ड, धार्मिक आस्था राख्नेहरूका लागि मन्दिर, प्रत्येक तलाका लागि २ ओटा सिँढी र लिफ्ट, बालबालिकाहरूका लागि बाल उद्यान तथा आगलागीको सुरक्षाका लागि प्रत्येक फ्ल्याटमा फायर फाइटरको लगायतका सुविधा रहेको वैदको भनाइ छ । त्यस्तै जिम क्लब, प्रत्येक २५ हजार लिटर पानी भण्डारण क्षमतासहितको सुविधा पनि पाइनेछ । ब्लक ‘सी’ मा अन्य ५० वटा अपार्टमेण्ट निर्माण भइरहेको उनले बताए । साढे १४ कठ्ठा क्षेत्रफलमा निर्माण गरिएको अपार्टमेन्टमा २७ वटा फ्ल्याट तीनवटा कोठासहितको स्नान घर, शौचालय भान्छा कोठा तथा ९ वटामा दुइटा कोठासहितको स्नान घर, शौचालय र भान्छा कोठा छ । त्यस्तै एउटा ब्लकमा चार वटा कोठासहित स्नान घर, भान्छा कोठा छ । सरकारी मापदण्ड पूरा गरी निर्माण गरिएको अपार्टमेन्टमा घरेलु कामदारका लागि स्नान घर र शौचालय सहितको छुट्टैै कोठाको पनि सुविधा दिइएको वैदले बताए । ९० लाखदेखि २ करोड मूल्यसम्मको अपार्टमेण्ट पछिल्लो समयमा बढ्दै गएको सहरी विकास र परिवर्तित मानसकिताअनुसार पनि अपार्टमेण्टमा मानिसहरूको आकर्षण बढ्दै गएको उनको भनाइ छ । जमिन किनेर घर बनाउँदा महँगो तथा सुरक्षा र आर्थिक भार समेत बढी हुने भएकोले सबै सुविधा एकै स्थानमा पाइने भएपछि जग्गा खरिद गरेर किन्ने झन्झटबाट मुक्त हुने पनि वैद बताउँछन् । आर्थिक र औद्योगिक सहर वीरगन्जमा बिक्री खुला गरिएको अपार्टमेण्ट प्रदेश नम्बर २ कै गौरव रहेको शालिमार समूहका अध्यक्ष वैद दाबी गर्छन् । नेपालका ठूला औद्योगिक घरानादेखि चिकित्सक, तथा इन्जिनियरहरूले अपार्टमेन्ट खरिद गरेको वैदले बताए ।
चारैतिर उज्यालो र अन्य स्थानका अपार्टमेन्टभन्दा फराकिलो भएकाले बस्नका लागि सुविधायुक्त अपार्टमेन्ट रहेको अपार्टमेण्ट बुकिङ गर्न आएका व्यावसायी प्रवीण गान्धीले सुनाए । औद्योगिक घरानाका परिवारहरू चारपुस्ता एकै स्थानमा बसिरहेकाले उनीहरूको रोजाइमा अपार्टमेन्ट पर्ने गरेको वैदको भनाइ छ । वर्तमान आवश्यकता पनि भएकाले विभिन्न परिवार एकै स्थानमा बसेपछि समुदायमा स्थापित हुने र भविष्यमा त्यही समुदायले नै यो अपार्टमेन्ट सञ्चालन गर्न सक्ने गरी योजना बनाइएको वैदले बताए ।