कारोबार संवाददाता
आइतवार, पुष २३, २०७४
674

राष्ट्रिय जनता पार्टी नेपालका अध्यक्ष मण्डलका सदस्य अनिल झाले मधेशको लागि एमाले अध्यक्ष केपी शर्मा ओलीभन्दा नेकपा माओवादी केन्द्रका अध्यक्ष पुष्पकमल दाहाल प्रचण्ड प्रधानमन्त्री बन्दा राम्रो हुने बताएका छन् ।
शनिबार रिपोर्टर्स क्लब नेपालले आयोजना गरेको साक्षात्कारमा उनले भने, “संघीयता, समावेशी–समानुपातिकको पक्षमा काम गरेको लिडर भनेको प्रचण्ड हो, त्यसैले उहाँ प्रधानमन्त्री बन्दा राम्रो हुन्छ ।”

उनले प्रचण्ड र ओलीमध्ये प्रचण्ड नै उदार नेता भएको पनि विश्वास दिलाए । उनले भने, “प्रचण्ड समावेशी, समानुपातिकमा काम गरेको नेता हो । उहाँ लिवरल हुनुहुन्छ ।” खस, बाहुन र क्षेत्री नेताहरुमध्ये संघीयता र समावेशीताको पक्षमा काम गरेको नेता प्रचण्ड भएको उनको भनाइ थियो ।
त्यस्तै, उनले वर्तमान सरकारलाई सबै अधिकार भएकोले ढिलो नगरी प्रदेश प्रमुख र प्रदेशको अस्थायी राजधानी तोक्नुपर्ने माग गरे । उनले भने, “हामीले त सर्वदलीय बैठकमा पनि भन्यौं– तपाईंको सरकार छ, तपाईंले नै गर्नुहोस् ।” सरकारलाई नै सबैले अधिकार दिएकोले अब तत्काल प्रदेश प्रमुख र अस्थायी राजधानी तोक्नुपर्ने नेता झाको भनाइ थियो ।

बक्स
‘राष्ट्रियसभा निर्वाचनपछि पनि सरकार नछाडे सडकबाट हटाउँछौं’
नेकपा (एमाले)का पोलिटब्युरो सदस्य तथा सांसद लालबाबु पण्डितले अहिलेसम्म पनि प्रदेश प्रमुख र प्रदेशको अस्थायी राजधानीसमेत तोक्न नसक्ने प्रधानमन्त्रीले राजीनामा दिनुपर्ने बताएका छन् । राष्ट्रियसभाको निर्वाचनसम्म कुर्ने र त्यसपछि पनि सरकारले राजीनामा गरेर बाटो खुला नगरेको खण्डमा सडकबाटै हटाउने सांसद पण्डितको भनाइ थियो ।
रिपोर्टर्स क्लबको साक्षात्कारमा उनले भने, “हामी निर्वाचनसम्म धैर्य गर्छौं, यदि त्यसपछि पनि उहाँहरु सरकारमै टाँसिरहन चाहनुभयो भने धकेलेर निकालिदिन्छौं ।”
सरकारलाई प्रदेश प्रमुख तोक्न र राजधानी तोक्नको लागि कसैले नरोकेको उल्लेख गर्दै नेता पण्डितले भने, “सरकारले नतोकिरहेको एउटा स्थिति छ । यदि सरकार तोक्न सक्ने हैसियतमा छैन भन्ने हो भने सरकार छोड्नुप¥यो । सरकार बनेको पहिलो हप्तामा हामी प्रदेशको अस्थायी राजधानी तोकिदिन्छौं । अहिले देखिएका सबै असहमतिहरु समाप्त भएर जान्छन् ।”
प्रदेश नम्बर १ को राजधानी सबै हिसाबले बृहत्तर विराटनगरलाई नै बनाउनुपर्नेमा उनको जोड थियो । उनले भने, “विराटनगर महानगरपालिकादेखि लिएर, ईटहरी उपमहानगरपालिका, दुहवी, सुन्दरहरैचाका ७ वटा वडा बनाएर बृहत्तर विराटनगर नामकरण गरेर प्रदेशको राजधानी तोकियो भने सबैभन्दा राम्रो हुन्छ ।”