कारोबार संवाददाता
बुधवार, कार्तिक २०, २०७६
280

गैरआवासीय नेपाली संघका अध्यक्ष कुमार पन्तको नेतृत्वमा संघका पदाधिकारीहरुले राष्ट्रिय योजना आयोगका उपाध्यक्ष तथा एनआरएन बोर्डका अध्यक्ष पुष्पराज कँडेलसँग भेट गरेका छन् ।
भेटमा राष्ट्रिय योजना आयोगले केहि पहिलेमात्र १५ औं राष्ट्रिय योजना तयार पारेको बताउँदै त्यस योजनामा सम्वाहक तथा सहयोगी शक्तिको रुपमा गैरआवासीय नेपालीहरु र नेपालको ख्यातिलाई पहिचान गरी आवश्यक सहकार्य र सहयोगको वातावरण बनाउन आयोग कटिवद्ध रहेको औंल्याउँदै गैरआवासीय नेपालीहरुलाई उपयुक्त भूमिका प्रदान गर्ने र त्यसका लागी आवश्यक बातावरण तयार गर्न आयोग तयार रहेको जानकारी दिए ।

आयोगका उपाध्यक्षले नेपाल पोलेसी ईन्ष्टिच्युट (एनपीआई) सँग सहकार्यहरु भईरहेको र यसको अगुवाई परराष्ट्र मन्त्रालयले गरिरहेको जानकारी गराएका थिए । उनले संघसँग छलफल गरी कस्तो प्रकारको र कसरी सहकार्य गर्न सकिन्छ भनि एउटा मार्गचित्र तयार पार्न सुझाव राख्दै विज्ञता हासिल गरेका गैरआवासीय नेपालीहरुलाई पनि एउटा मापदण्ड तयार गरी करारमा नियुक्ति दिन समेत आयोगको सोच रहेका जानकारी दिए ।
सो अवसरमा संघका अध्यक्ष कुमार पन्तले गैरआवासीय नेपालीहरुले हासिल गरेका ज्ञान तथा सिप नेपालको सम्वृद्धिमा परिचालन गर्ने उदेश्य अनुरुप संघले पहिलो एनआरएन ग्लोबल नलेज कन्फरेन्स आयोजना गरेको र यसलाई निरन्तरता दिने तथा संघले नेपाल सरकार संग सम्झौता गरी गैरआवासीय नेपालीहरु मार्फत १० अर्ब भन्दा माथिको लगानी योग्य पूँजी नेपाल भित्र्याउन आवश्यक पहलहरु गरिरहेको बताए । उनले हालै सम्पन्न गैरआवासीय नेपाली संघको निर्वाचमा देखिएको राजनीतिक हस्तक्षेपबाट संघलाई मुक्त गर्न अव उप्रान्त गैरआवासीय नेपालीहरु बसोबास गर्ने देशबाटै विद्युतिय प्रणलीमार्फत निर्वाचनको व्यवस्था मिलाउने समेत जानकारी गराएका थिए । संघका प्रतिनिधिहरुले विदेशमा रहेका दोस्रो पुस्ताका नेपालीहरुको लगाव नेपाल प्रति बढाउन उनीहरुलाई नेपालमै आई ईन्र्टनसिप गर्ने व्यवस्थाको लागी सहजिकरण गरिदिन गरेको अनुरोधको सरहाना गर्दै यस प्रति के गर्न सकिन्छ भनि अध्ययन गर्न आयोग तयार रहेको उपध्यक्षले बताए । भेटघाट कार्यक्रममा संघका उपध्यक्ष अर्जुन कुमार श्रेष्ठ र सोनाम लामा, कोषाध्यक्ष महेश कुमार श्रेष्ठका साथै प्रमुख कार्यकारी अधिकृतको सहभागीता रहेको थियो ।