कारोबार संवाददाता
सोमवार, कार्तिक २५, २०७६
1341

खोटाङ- दश स्थानीय तह रहेको यस जिल्लामा स्वास्थ्य बिमा गर्नेहरूको संख्या २६ हजार नाघेको छ । विसं २०७४ पुस २४ गतेदेखि सुरु गरिएको कार्यक्रममा गत असोज मसान्तसम्म १२ हाजर १८६ परिवारका २६ हजार ४७ ले स्वास्थ्य बिमा गराएका छन् ।
बिमा गराउनेमध्ये १३ हजार २६८ महिला र १२ हजार ७७७ पुरुष रहेको स्वास्थ्य बिमा बोर्डका जिल्ला संयोजक सन्तोष दाहालले बताए । उनका अनुसार दिक्तेल रुपाकोट मझुवागढी नगरपालिकामा सात हजार ६२६, हलेसी तुवाचुङ नगरपालिकामा चार हजार ३४८, बराहपोखरी गाउँपालिकामा तीन हजार ९०, खोटेहाङ गाउँपालिकामा दुई हजार ४०९ र दिप्रुङ चुइचुम्मा गाउँपालिकामा दुई हजार ७६ले बिमा गरेका छन् ।

यसैगरी ऐसेलुखर्क गाउँपालिकामा एक हाजर ८७१, केपिलासगढी गाउँपालिकामा एक हजार २५४, जन्तेढुंगा गाउँपालिकामा एक हजार २२६, रावाबेँसी गाउँपालिकामा एक हजार २२२ र साकेला गाउँपालिकामा ८७९ बीमित भएको संयोजक दाहालले जानकारी दिए । उपचार खर्च अभावमा अकालमा ज्यान गुमाउन बाध्य नागरिकको जीवन रक्षाका लागि नेपाल सरकारले ल्याएको बिमाका लागि दशवटै स्थानीय तहमा स्वास्थ्य दर्ता कार्यक्रम सञ्चालन भइरहेको छ ।
पाँच जनासम्मको परिवारले वार्षिकरूपमा दुई हजार ५०० को स्वास्थ्य बिमा गरेपछि बिरामी परेमा वार्षिक ५० हजारसम्म उपचार खर्च पाउने सुनेपछि स्थानीयवासी यसप्रति आकर्षित भएका हुन् ।
पाँचभन्दा बढी सदस्य भएका परिवारले स्वास्थ्य बिमा गर्न थप प्रतिव्यक्ति ४५० का दरले शुल्क बुझाउनु पर्छ भने उपचार खर्च पनि ५० हजारमा प्रतिव्यक्ति थप १० हजारका दरले बढी पाउनेछन् । दुई नगरपालिकासहित दश स्थानीय तह रहेको यस जिल्लाको जनसंख्या दुई लाख छ हजार ३१२ छ ।