रासस
मंगलबार, जेठ १३, २०७७
379

कास्की- गण्डकी प्रदेशमा हालसम्म दुई हजार ४५ को कोरोना पीसीआर जाँच भएको छ । तीमध्ये दुई हजार ११ को जाँचको नतिजा नेगेटिभ आएको, बाँकी २९ को रिपोर्ट आउन बाँकी रहेको र दुई जनाको पोजेटिभ नतिजा आए पनि निको भएर घर फर्किसकेका प्रदेशका स्वास्थ्य निर्देशक डा. विनोदविन्दु शर्माले जानकारी दिए । नवलपुरका दुई जनाको भरतपुरमा र लमजुङका एक जनाको काठमाडौंमा संक्रमण देखिएको हो । दुई भरतपुर अस्पताल र एक जना टेकु अस्पताल काठमाडौमा उपचार भइरहेको जनाइएको छ ।
त्यसैगरी आरडीटी जाँच आठ हजार २१८ जनाको गरिएको छ । कोरोना रोकथाम र नियन्त्रणका लागि प्रदेश सामाजिक विकास मन्त्रालयले जटिल अवस्थाका बिरामीको व्यवस्थापनसम्बन्धी तालिमसमेत सम्पन्न गरेको छ । एनस्थेसियोलोजिष्ट डा. हरि पौडलले उक्त तालिमको सहजीकरण गरेका थिए । तालिममा स्याङ्जा, गोर्खा, नवपुर, तनहुँ, लमजुङ अस्पतालका ३२ जना चिकित्सक र स्वास्थ्यकर्मीको उपस्थिति रहेको उनले जानकारी दिए । उनका अनुसार कोरोनासँगै प्रदेशमा अन्य पाँच प्रकारका रोगसमेत देखिन थालेपछि सचेतनामूलक कार्यक्रमलाई जोड दिइएको छ । गोर्खा र कास्कीमा मलेरिया पोजेटिभ, गोर्खामा नै दादुरा तथा म्याग्दीमा स्क्रबटाइफस देखिएको छ । म्याग्दी, कास्की र स्याङ्जा जिल्लामा डेंगु देखिएको छ ।