कारोबार संवाददाता
बिहिवार, जेठ ९, २०७६
565

अन्तर्राष्ट्रिय श्रम संगठन (आईएलओ)का उपमहानिर्देशक तथा एसिया प्रशान्त क्षेत्रका निर्देशक तोमोको निशिमोतोेले नेपालको सामाजिक, आर्थिक तथा श्रम बजारमा भएका सुधारहरूको प्रशंसा गरेकी छिन् ।
सामाजिक न्याय र मर्यादित कामको वकालत गर्ने अग्रणी संयुक्त राष्ट्रसंघको विशिष्टीकृत संस्था आईएलओले सय वर्षगाँठ मनाउने क्रममा आफ्नो चार दिने औपचारिक भ्रमण सम्पन्न गरी बुधबार बैंकक प्रस्थान गर्नुअघि सो धारणा व्यक्त गरेकी हुन् । भविष्यमा कामका स्वरूपलाई मानव केन्द्रित बनाउनुपर्ने विषयमा जोड दिँदै आईएलओले सरकार, रोजगारदाताहरू तथा श्रमिकहरूका संघसंगठनहरूलगायत अन्य सरोकारवालासँग मिलेर आफ्नो शताब्दीवर्ष मनाइरहेको छ ।
प्रविधिहरूले रोजगारीमा ल्याएका परिवर्तनहरूले गर्दा नयाँ सीपहरूको खाँचो बढेको, कतिपय अवस्थामा परम्परागत रोजगारीहरू विस्तापित हुँदै गएको परिपेक्षमा सबैका लागि सामाजिक न्याय र मयादित कामको सुनिश्चितताका लागि असामान्य मेहनत आवश्यक रहेको निशिमोताले बताइन् ।
मंगलबार प्रधानमन्त्री केपी शर्मा ओलीसँगको शिष्टाचार भेटघाटमा उनले उज्वल भविष्यका लागि काम विषयमा विज्ञहरू सम्मिलित अन्तर्राष्ट्रिय आयोगले प्रतिवेदन दिएको र आगामी जुनमा जेनेभामा हुने अन्तर्राष्ट्रिय श्रम सम्मेलनले त्यसमा बृहत् बहस गर्ने जानकारी दिइन् । यसैगरी प्रधानमन्त्री ओलीले नेपालले न्यूनतम ज्याला वृद्धि गरेको, योगदानमा आधारित सामाजिक सुरक्षाको कार्यक्रमको थालनी गरेको र श्रम बजारलाई जनमुखी बनाउन नयाँ कानुनहरू ल्याएकाबारे अवगत गराए ।
यसैगरी निशिमोतोले अर्थमन्त्री युवराज खतिवडा र श्रम, रोजगार तथा सामाजिक सुरक्षामन्त्री गोकर्ण विष्टसँगको छुट्टाछुट्टै भेटघाटमा नेपालको श्रम बजार, सामाजिक सुरक्षा, रोजगारी सिर्जनालगायत श्रम प्रशासनको सशक्तीकरणबारे छलफल गरिन् । आसियान मुलुकहरूले मर्यादित काम र रोजगारीमा गरेको प्रगतिबारे पनि उनले उल्लेख गरिन् । नेपाल सरकारसँग मिलेर रोजगार प्रवद्र्धनका क्षेत्रमा थप प्राविधिक सहयोग गर्न आईएलओ तयार रहेको पनि निशिमोतोले बताइन् ।

श्रम, रोजगार तथा सामाजिक सुरक्षा सचिव महेशप्रसाद दाहालले वरिष्ठ आईएलओ अधिकारीलाई नेपालको सन्दर्भमा महत्व राख्ने आर्र्ईएलओका केही महासन्धि अनुमोदन गर्ने सम्भावना रहेको जानकारी दिए ।
आईएलओका उपमहानिर्देशक तथा एसिया प्रशान्त क्षेत्रका निर्देशक, निशिमोतोले नेपाल उद्योग वाणिज्य महासंघका अध्यक्ष भवानी राणालगायत विभिन्न ट्रेड युनियनका प्रतिनिधिहरूसँग श्रम, रोजगार सिर्जना र चुनौतीहरूबारे छलफल गरेका थिए । आफ्नो १०० वर्षगाँठ मनाउने क्रममा आईएलओले काठमाडौंमा सोमबार कार्यक्रम गर्दै सामाजिक न्याय र मर्यादित कामका लागि सबै पक्षको थप सहयोग रहेको औंल्यायो ।