कारोबार संवाददाता
बुधवार, असार ११, २०७६
601

त्रिभुवन विश्वविद्यालयको बल्खुस्थित परीक्षा नियन्त्रण कार्यालय (पनिका)ले सूचना प्रविधिमैत्री प्रणालीमार्फत् सबै काम गर्न थालेको छ । पनिकाले यस वर्षदेखि परीक्षासम्बन्धी फारम भर्ने, लब्धाङ्कपत्र नतिजा, सिम्बोल नम्बर र परीक्षा केन्द्रजस्ता सबै काम अनलाइनमार्फत् गर्न थालेको पनिकाका सहनियन्त्रक पशुपति अधिकारीले जानकारी दिए ।
पनिकाले टियुएक्जाम डट इडियू डट एनपी वेबसाइटमार्फत् सबै काम गर्न थालेको छ । यस वर्षदेखि पनिकाको वेबसाइटबाट नै सिम्बोल नम्बर र परीक्षा केन्द्र हेर्न सकिनेछ । परीक्षार्थीले आफ्नो त्रिवि रजिष्ट्रेशन नम्बर वेबसाइटमा राखेपछि सिम्बोल नम्बर र परीक्षा केन्द्र थाहा पाउने उनले जानकारी दिए ।

पनिकाले पहिलो पटक वेबसाइटमार्फत् यही बुधबारदेखि हुने प्राइभेटतर्फको स्नातकोत्तर तहको राजनीतिकशास्त्र र जनप्रशासन तथा स्नातक तहको परीक्षाका लागि पनिकाले सिम्बोल नम्बर र परीक्षाकेन्द्र हेर्ने व्यवस्था गरेको हो । “यस वर्षदेखि हामी पनिकालाई सूचनामैत्री बनाउन थालेका छौँ,” उनले भने, “विद्यार्थीको सहजता र प्रविधिअनुसार पनिकालाई लैजान सबै कार्य अनलाइनमार्फत गर्न थालेका हौं ।”
उनका अनुसार पनिकाले यसै वर्षदेखि सबै सङ्काय र तहको परीक्षा नतिजा र पाँच क्याम्पसको प्रथम वर्षको परीक्षा फारामसमेत अनलाइनमार्फत भर्न थालेको छ । पनिकाले पद्मकन्या बहुमुखी क्याम्पस, काठमाडौँ, पृथ्वीनारायण वहुमुखी क्याम्पस पोखरा, लुम्बिनी वाणिज्य क्याम्पस बुटवल, कैलाली बहुमुखी क्याम्पस धनगढी र महेन्द्र वहुमुखी क्याम्पस इलाममा पहिलो पटक अनलाइनमार्फत् फाराम भर्न थालिएको उनले जानकारी दिए ।
यस्तै पनिकाले लब्धाङ्कपत्र पनि अनलाइनमार्फत उपलब्ध गराउने भएको छ । सह–नियन्त्रक अधिकारीले सम्बन्धित क्याम्पसलाई वेबसाइटको पासवर्ड उपलब्ध गराएर क्याम्पसले आफैं नै प्रिन्ट गर्न सक्ने गरी विद्यार्थीलाई लब्धाङ्क पत्र उपलब्ध गराउन थालिएको जानकारी गराए । उनका अनुसार आगामी प्रथम वर्षको नतिजाको लब्धाङ्कपत्र क्याम्पसलाई नै उपलब्ध गराउने गरी काम भइरहेको छ ।