कारोबार संवाददाता
शुक्रवार, माघ ३, २०७६
372

 
२०७३ साल साउन १२ गते १८८१ पुगेको नेप्से परिसूचकको तुलनामा अहिलेको वृद्धिदरले पनि त्यो अवस्थासम्म पुग्न अझै निकै समय लाग्ने देखिन्छ ।


नेपाल धितोपत्र बोर्डले नयाँ नेतृत्व पाउनु र सेयर बजार तीव्र गतिमा बढ्नु संयोगमात्र हुन सक्दैन । केही दिनअघि अर्थमन्त्री डा. युवराज खतिवडा बहिर्गमनको हल्ला गरेर बढाइएको सेयर बजारमा अहिले भने पुँजी बजारप्रति जानकार र सकारात्मक मानिएका भीष्म ढुंगाना नियामक निकाय नेपाल धितोपत्र बोर्डको अध्यक्षका रुपमा चयन भएसँगै बजारको उकालो यात्रा रोकिएको छैन । बिहीबारमात्र बजारले १३ सय अंक नाघेको छ र एकैदिन १ अर्ब ७० करोडको कारोबार भएर उत्साह जगाएको छ । यसले लामो समयदेखि निराश लगानीकर्ताको मुहारमा खुसी त ल्याएको छ तर यो कति दीर्घकालीन हुन्छ भन्नेमा चाहिँ अन्योल नै छ ।

माघको पहिलो साता बजारमा सामान्यतया तरलता अभावले सेयर बजार पनि प्रभावित हुनुपर्ने हो । तर, यस वर्ष भने बैंकहरूको ऋण लगानी रोकिएर तरलता बढेपछि यसको सीधा प्रभाव सेयर बजारमा देखियो । व्यक्तिगत प्रयोजनका ऋणमा कडा प्रावधानपछि बैंकसँग पर्याप्त तरलता रहेकाले यसको उपयोग सेयर धितो कर्जामार्फत भइरहेको देखिन्छ । यसले पुँजी बजार सकारात्मक देखिए पनि रियल सेक्टर भने माथि उठ्ने देखिँदैन, त्यसैले बजारको यो उकालो यात्राको भविश्य पनि अनिश्चित नै छ । पुस मसान्तको कर भुक्तानीपछि पनि बैंकिङ प्रणालीमा करिब ४५ अर्बको अधिक तरलता रहेको बताइन्छ । पछिल्लो दुई सातामा बजारले यस्तै फराकिलो छलाङ मारिरहेको छ ।
त्यसो त २०७३ साल साउन १२ गते १८८१ पुगेको नेप्से परिसूचकको तुलनामा अहिलेको वृद्धिदरले पनि त्यो अवस्थासम्म पुग्न अझै निकै समय लाग्ने देखिन्छ । किनकी विगत डेढ वर्षदेखि नेप्से ११०० देखि १३५० कै आसपासमा घुमिरहेको छ । यतिमात्र नभई अर्थतन्त्रको आकार बढ्दा नेप्से संकुचनको अवस्थामा रहनुलाई धेरैले अस्वाभाविक नै मान्दै आएको हो । तथ्यांकअनुसार कुल गार्हस्थ्य उत्पादन २२ खर्बको हाराहारी रहँदा करिब २० खर्बमा रहेको बजार पुँजीकरण अहिले जीडीपी ३५ खर्ब हुँदा पनि पुँजीकरण भने १६ खर्ब हाराहारीमा छ । सेबोनका नयाँ अध्यक्षलाई बजारले यसरी स्वागत गरिरहँदा यसले स्थिरता वा निरन्तरता पाउँछ कि पाउँदैन भन्ने आमचासोको विषय बनेको छ ।
नेपालको एकमात्र धितोपत्र कारोबार बजार नेप्सेमा कारोबार हुने वित्तीय उपकरणहरूको सीमितता पनि छ किनकि अहिले पनि यहाँ साधारण सेयरको मात्र कारोबार भइरहेको छ । सीडीएससी सञ्चालनमा आइसके पनि यसको सफल सञ्चालनका लागि अक्सन मार्केट अपरिहार्य छ । अक्सन मार्केट छुट्टै सञ्चालन हुनसके कारोबार आकार बढ्न सक्छ । अर्कातर्फ संसारका कतिपय मुलुकमा अभ्यास रहेको आजै किनेर आजै बेच्ने अर्थात इन्ट्राडे कारोबार हुनसके यसले बजारलाई गति दिनेछ । गैरआवासीय नेपालीको लगानी सेयरबजारमा ल्याउने चर्चा साँच्चै कार्यान्वयन हुनसके यसले पनि बजारको दिगो विकास गर्नसक्छ भने यसबाहेक पुँजीबजारसँग सम्बन्धित कानुन परिमार्जनमा पनि सेबोन नेतृत्व लाग्नसके अहिलेको वृद्धिदरलाई स्थायित्व दिन सकिन्छ । नत्र, नयाँ अध्यक्षप्रतिको भरोसा त्यत्तिकै समाप्त भएर नजाला भन्न सकिँदैन ।