कारोबार संवाददाता
बिहिवार, चैत्र १३, २०७६
218

विद्युत् खपत चार सय मेगावाटसम्म घट्यो

कोरोना भाइरसको संक्रमणबाट बच्न सरकारले देशैभर लकडाउन घोषणा गरेसँगै बढी विद्युत् खपत गर्ने उद्योग तथा कलकारखाना बन्द हुँदा समग्र विद्युत् माग नै घटेको छ । लकडाउनको कारण कलकारखाना, होटल, व्यापारिक भवन, कार्यालयहरू बन्द छन् । यससँगै विद्युत्को माग साँझ (पिकआवर)मा २१५ मेगावाट र दिउँसोको समयमा ४ सय मेगावाट घटेको हो ।
अत्यावश्यकीय सेवाबाहेक अन्य कार्यालय र सेवा बन्द भएकाले अहिले घरायसी प्रयोजनका लागि मात्रै विद्युत् प्रयोग भइरहेकाले माग एक्कासी घटेको नेपाल विद्युत् प्राधिकरणका कार्यकारी निर्देशक कुलमान घिसिङले जानकारी दिए । “लकडाउनका कारण घरायसी प्रयोजनका लागि ग्यासको अभाव भएमा इन्डक्सन चुलो लगायतका विद्युतीय उपकरण ढुक्कसँग चलाउनु होला, हामीसँग पर्याप्त विद्युत् उपलब्ध छ,” घिसिङले भने ।
लकडाउनपछि औद्योगिकको पूर्ण रूपमातथा घरायसीको क्रमशः माग घट्दै गएको छ । लकडाउनअघि पिक आवरमा १ हजार २ सय मेगावाट पुगेको विद्युत्को माग लकडाउनपछि भने ९ सय ४५ मेगावाटमा झरेको छ भने दिउँसो १ हजार मेगावाट माग हुने गरेकोमा घटेर ६ सय मेगावाटमा झरेको विद्युत् प्राधिकरणका प्रवक्ता प्रवल अधिकारीले जानकारी दिए । “काठमाडौंबाट धेरै गाउँ फर्केको तथा विद्युत् बढी खपत हुने उपकरणहरूको पनि कम प्रयोग हुन थालेकोले विद्युत् माग धेरै घटेको छ,” उनले भने । प्राधिकरणका अनुसार बिहानको माग पनि घटेर ४ सय ४० र रातीको माग ४ सय ८० मेगावाट पुगेको छ ।
विद्युत् बढी खपत हुने काठमाडौं उपत्यकाको विद्युत्को माग पनि पूरै घटेको छ । लकडाउनभन्दा पहिले विद्युत्को अधिकतम माग साढे तीन सय मेगावाटको हाराहारी रहेकोमा मंगलबार मुलुकभरको माग ९ सय ४५ मेगावाट हुँदा काठमाडौं उपत्यकाको २ सय ९० मेगावाटमा सीमित भएको छ । काठमाडौं उपत्यकामा मंगलबार बिहान विद्युत् माग १ सय ३ मेगावाट र राति १ सय १७ मेगावाटमात्र रहेको प्राधिकरणले जनाएको छ । बुधबार बिहान काठमाडौं उपत्यकाको विद्युत्को माग १ सय ४ मेगावाट मध्याह्न १२ बजे १ सय ८२ मेगावाट पुगेको छ ।
प्राधिकरणले पानी, हावाहुरी, प्राविधिकलगायतका कारण कुनै स्थानमा केहीबेर विद्युत् अवरोध हुन सक्ने भए पनि त्यसको मर्मतसम्भार गरी तत्काल सेवा सुचारु गराउन लकडाउनको बेला पनि कर्मचारीहरू चौबीसै घण्टा तयारी अवस्थामा रहेको पनि जनाएको छ । विद्युत्को माग घटेसँगै भारतबाट आयात हुने विद्युत्को परिणाम पनि घटेको छ भने कुलेखानी पनि चलाइएको छैन । घिसिङका अनुसार अहिले ढल्केबर–मुज्जफ्फरपुर प्रसारणलाइनबाट मात्रै पिक समयमा करिब १ सय ५० मेगावाटसम्म विद्युत् ल्याइएको छ भने बिहीबार बेलुकाबाट ५० मेगावाट मात्रै ल्याइने छ । उनले राति विद्युत्को लोड घटेकाले प्राधिकरणका विद्युत् गृह बन्द गर्नुपर्ने अवस्था रहेको बताए । प्राधिकरणले आफ्ना स्वामित्वका, निजी क्षेत्रका विद्युत् ्गृहबाट उत्पादित विद्युत्बाट आपूर्ति गरिरहेको छ ।