कारोबार संवाददाता
मंगलबार, चैत्र ११, २०७६
682

स्वदेशी लगानीमा निर्माणाधीन ४५६ मेगावाटको माथिल्लो तामाकोशी जलविद्युत् आयोजनाले आगामी साउनदेखि उत्पादन सुरु गर्ने भएको छ । २०६५ सालबाट निर्माण सुरु भएको आयोजनाको पहिलो युनिटको विद्युत्को उत्पादन आगामी साउनको दोस्रो सातादेखि उत्पादन गर्ने भएको हो ।
साउनमा पहिलो युनिटबाट ७६ मेगावाट विद्युत् उत्पादन गर्ने र त्यसपछि बाँकी पाँच युनिटबाट पनि क्रमशः उत्पादन गर्ने कार्यतालिका आयोजनाको छ । आगामी असारसम्म सम्पूर्ण परीक्षण सकेर साउनको दोस्रो सातादेखि विद्युत् उत्पादन गर्ने लक्ष्यसहित आयोजनाको काम अघि बढीरहेको आयोजनाको प्रवद्र्धक कम्पनी माथिल्लो तामाकोशी हाइड्रोपावर लिमीटेडका प्रमुख कार्यकारी अधिकृत विज्ञान श्रेष्ठले जानकारी दिए ।

आयोजनाका अनुसार, तामाकोसीको बाँध तथा बालुवा थिग्र्याउने (डिसेन्डिङ वेसिन) पोखरीको प्राविधिक परीक्षण सुरु भइसकेको छ । गत सोमबारबाट पानी जम्मा गर्न सुरु गरिएकोमा आइतबार पोखरी भरिएको छ । आठवटा ढोका रहेको बाँधमा चारवटा डिसेन्डिङ बेसिन राखिएका छन् । बाँधको परीक्षण सफलतापूर्वक सम्पन भएको छ । बेसिनमार्फत मुख्य सुरुङ हुँदै पावर हाउससम्म पानी पु¥याइन्छ । २२ मिटर उचाइ तथा ६० मिटर चौडाइको बाँध निर्माण गरिएको आयोजनाको समग्र रुपमा ९९ प्रतिशत काम सम्पन्न भइसकेको छ ।
आयोजनाको सबैभन्दा जटिल ठानिएको आयोजनाको ठाडो सुरुङमा ३ सय ५५ मिटर लामो पेनस्टक पाइप जडान तथा तल्लो ठाडो सुरुङमा २ सय २० मिटर र माथिल्लो ठाडो सुरुङमा १ सय ३५ मिटर पेनस्टक पाइप जडान गरिसकिएको छ । तर तल्लो ठाडो सुरुङमा १ सय ४७ र माथिल्लो ठाडो सुरुङमा १ सय ७१ मिटर पाइप जडान गर्न बाँकी छ । पाइप जडानको काम आगामी वैशाख महिनाभर सकेपछि माथिल्लो र तल्लो ठाडो सुरुङका बीचमा रहेको तेर्सो भागमा पाइप जडान गर्ने योजना आयोजनाको छ
आयोजनाका अनुसार, सिभिलअन्तर्गत मुख्य सुरुङमा ग्राउटिङ र कंक्रिटिङ गर्ने काम अन्तिम चरणमा पुगेको कम्पनीका अध्यक्ष एवं नेपाल विद्युत् प्राधिकरणका कार्यकारी निर्देशक कुलमान घिसिङले जानकारी दिए । उनका अनुसार, विद्युत् गृहका सम्पूर्ण उपकरण यसअघि नै जडान भइसकेको छ ।
आइतबार ऊर्जा, जलश्रोत तथा सिंचाइमन्त्री वर्षमान पुन मन्त्री पुनसहित महिला बालबालिका तथा ज्येष्ठ नागरिकमन्त्री पार्वत गुरुङ, राष्ट्रिय योजना आयोगका उपाध्यक्ष डा. पुष्प कँडेल, सदस्य डा. कृष्णप्रसाद ओली, प्राधिकरणका कार्यकारी निर्देशक घिसिङसहितको टोलीले आयोजनाको निरीक्षण भ्रमण गरेको छ । बाँध, सुरुङ र पावर हाउसको निरीक्षणपछि मन्त्री पुनले निर्धारित मितिमै बाँकी काम सम्पन्न गर्न आयोजनाका पदाधिकारी, निर्माण कम्पनी र परामर्शदातालाई निर्देशन दिए ।
भूकम्पलगायत कारण आयोजना निर्माणमा ढिलाइ भए पनि अब भने समयमै काम सक्नुपर्ने बताउँदै काम गर्ने सिलसिलामा आइपर्ने जस्तोसुकै व्यवधान हटाउन सरकार तयार रहेको बताए । “माथिल्लो तामाकोसीमा सरकारको मात्र होइन, शेयरमार्फत जनताको ठूलो लगानी परेको छ”, मन्त्री पुनले भने, “धेरै काम भएको छ, अब बाँकी काम जसरी भए पनि समयमै हुनुपर्छ ।” दोलखाबाट निर्वाचित प्रतिनिधिसभा सदस्य गुरुङले देशकै सबैभन्दा ठूलो आयोजना जिल्लामा बन्नु दोलखाकासीका लागि खुसीको कुरा भएको बताए ।