कारोबार संवाददाता
शुक्रवार, मंसिर ६, २०७६
389

नेपालका प्रत्येक एक सय घरधुरीमध्ये ९५ घरधुरीमा विद्युत् पहुँच पुगेको विश्व बैंकको एक सर्भेक्षणले देखाएको छ । ऊर्जा सम्मेलन २०१९ का क्रममा सार्वजनिक गरिएको प्रतिवेदनमा नेपालमा विद्युत् पहुँचको गुुणस्तरमा उल्लेख्यनीय सुधार भएको उल्लेख गर्दै यस्तो तथ्यांक सार्वजनिक गरिएको छ । ७१.७ प्रतिशत घरपरिवारले राष्ट्रिय ग्रिडबाट तथा २३ प्रतिशतले माइक्रो वा मिनी हाइड्रो र सौर्य ऊर्जा बाट विद्युत् प्राप्त गरेको प्रतिवेदनले देखाएको छ । विद्युत् पहुँचको गुणस्तरमा प्रगति भए पनि प्रतिएक सयमध्ये ७० परिवारले अझै प्रदूषणकारी र हानीकारक इन्धनलाई खाना पकाउनमा प्रयोग गरिरहेको प्रतिवेदनमा उल्लेख छ ।
ऊर्जा, जलस्रोत तथा सिँचाइमन्त्री वर्षमान पुन र विश्व बैंकका राष्ट्रिय निर्देशक फारिस हदादले सम्मेलनमा सार्वजनिक गरेको प्रतिवेदनमा करिव ६७ प्रतिशत घरपरिवारले दिनको कम्तिमा आठ घण्टा बिजुलीमा अविरल पहुँच पाएको उल्लेख छ । “नेपालका प्रत्येक व्यक्तिलाई उच्चस्तरीय उर्जा सेवाहरूको पहुँच प्रदान गर्नु सरकारको उच्च प्राथमिकताहरूमध्ये एक हो । सन् २०२३ सम्ममा हामी १०० प्रतिशत उर्जा पहुँचका लागि काम गरिरहेका छौं,” ऊर्जा, जलस्रोत र सिँचाइ मन्त्रालयका सचिव दिनेशकुमार घिमिरेले भने ।

२०१७ को सर्वेक्षण पछि नेपालले ग्रिड विद्युतीकरण जनसंख्या ७२ देखि ७८ प्रतिशत पुगेको छ । सन् २०१८ देखि मुलुकमा लोडसेडिङ मुुक्त हुँदै आएको छ । “हामी नेपालले गरेका यी उपलब्धिहरूलाई प्रगति मानेका छौं, प्रकाश र सफा कुकिङका लागि ऊर्जा सेवाको गुणस्तर सुधार गर्न र नेपालका जनताको जीवनलाई अझ राम्रो बनाउन सरकारसँग साझेदार भएकोमा हामी गर्व गर्दछौं,” नेपालका लागि विश्व बैंक राष्ट्रियय निर्देशक फरिसले भने ।
“आउँदो दिनमा पर्याप्त बिजुली आपूर्ति भएपछि खाना पकाउन आयात गरिएको एलपी ग्यासमा ठूलो निर्भरता हटाउनुपर्नेछ, सरकारले सफा कुकिङ समाधानमा बढी जोड दिनेछ र हरेक घरमा एउटा बिजुली चुल्हो प्राप्त गर्ने लक्ष्य राख्नेछ,” वैकल्पिक उर्जा प्रवद्र्धन केन्द्रका कार्यकारी निर्देशक मधुसूदन अधिकारीले भने ।
सर्भेक्षणले विद्युतीय चुल्हो र वायोग्याँसमार्फत परम्परागत ऊर्जालाई न्यूनीकरण गर्दै जानुपर्ने बताउँदै यसका लागि परिणामुखीय लगानीको आवश्यकता रहेको उल्लेख छ । यसका लागि स्थानीय निकायलाई सहभागी गराउनुका साथै उनीहरूको क्षमता र दक्षता अभिवृद्धिको आवश्यकता रहेको प्रतिवेदनमा उल्लेख छ ।