रासस
सोमवार, मंसिर २, २०७६
197

हेटौँडा- भूमिगत जलस्रोत तथा सिँचाइ विकास डिभिजन कार्यालय पर्साले तीन करोड ५० लाख रुपैयाँको लागतमा यस वर्ष १७ वटा डिप ट्युबवेल जडान गरी विभिन्न स्थानमा सिँचाइ सुविधा पु-याएको छ । प्रदेश नं २ सरकारको निःसर्त अनुदान कार्यक्रमअन्तर्गत बारा र पर्सा जिल्लाको ग्रामीण क्षेत्रमा उक्त डिप ट्युबवेल निर्माण गरिएको कार्यालयको प्राविधिक शाखाले जनाएको छ ।
कार्यालयका अनुसार बाराका ११ र पर्साका छ स्थानमा डिप ट्युबवेल जडान गरिएको हो । उपभोक्ता समितिमार्फत जडान गरिएका डिप ट्युबवेलबाट ४२५ बिगाहा जमिन सिञ्चित भइरहेको बताइएको छ ।
ती डिप ट्युबवेल पर्साको वीरगञ्ज उपमहानगरपालिका–२, पोखरिया, बगही, निचुटा र धोवनीमा तथा बाराको फेटागाउँ, विश्रामपुर, पचरौता, गञ्जभवानीपुर, स्वर्ण गाउँपालिका, तेलकुवाँ र प्रष्टोकामा निर्माण गरिएको हो । एउटा डिप ट्युबवेलमा करिब २० लाख रुपैयाँ खर्च लाग्ने गरेको कार्यालयले जनाएको छ ।