कारोबार संवाददाता
मंगलबार, भदौ ३१, २०७६
522

७६२ मेगावाटको तमोर जलाशययुक्त आयोजना निर्माण अघि बढाउन नेपाली र चिनियाँ कम्पनीको संयुक्त प्रस्ताव परेको छ । सरकार स्वमित्वको जलविद्युत् लगानी तथा विकास कम्पनी (एचआईडीसीएल) र चीनको पावर चाइना कर्पोरेसनको तमोर जलाशय अघि बढाउन संयुक्त प्रस्ताव परेको हो ।
तमोरमा ६ विदेशी कम्पनीले चासो देखाएपनि गत साउन १६ गते बसेको लगानी बोर्ड बैठकले एचआईडीसीएल तथा पावर चाइना संयुक्त तथा कतारको नेब्रस पावर होल्डिङ्स र जापानको फुजी इलेक्ट्रिक कम्पनी लिमिटेड संयुक्तलाई छनोट गरी लगानी बोर्डले प्रस्ताव आह्वान गरेको थियो । २१ दिनभित्र दुवै कम्पनीसँग प्रस्ताव गरेपनि एचआईडीसीएलसहितले मात्र पेश गरेका हुन् ।

लगानी सम्मेलनमा सो केस गरिएको आयोजना सार्वजनिक र निजी साझेदारी (पीपीपी) मोडेलमा अघि बढाउन लागिएको छ । मूल्यांकन गरेपछि स्वीकृतिका लागि लगानी बोर्डमा पेस हुने र यसका आधारमा आयोजनाको अध्ययनका लागि अनुमतिपत्र (लाइसेन्स) दिने लगायतका प्रक्रिया अघि बढाइने लगानी बोर्डले जनाएको छ । विद्युत् प्राधिकरणले तमोर जलाशययुक्त आयोजना अघि बढाउनका लागि कम्पनी समेत गठन गरिसकेको थियो तर विद्युत् विकास विभागले २५२ मेगावाटको मात्र लाइसेन्स दिएको थियो ।
आयोजना बनाउँदा निर्माणाधीन ३७.६ मेगावाटको काबेली ए र सञ्चालनमा आएको २१.६ मेगावाटको तल्लो हेवा जलविद्युत् आयोजना डुबानमा पर्ने भन्दै विद्युत् विकास विभागले लाइसेन्स दिन प्राधिकरणलाई आनाकानी गरेको थियो । सोही आयोजना लगानी बोर्डले सम्मेलनमा सोकेस गरेको थियो । विद्युत् प्राधिकरणका कार्यकारी निर्देशक कुलमान घिसिङले तमोर आयोजना लगानी बोर्डको मातहतमा पुगिसकेको र आफूहरूसँग नरहेको बताए ।
विद्युत् प्राधिकरणले गरेको सम्भाव्यता अध्ययनअनुसार आयोजना बनाउन सो एक खर्ब लाग्ने अनुमान गरिएको आयोजनाको प्रारम्भिक अध्ययन मात्र भएको छ । लाइसेन्स पाएपछि एचआईडीसीएलसहितको संयुक्त उपक्रमले थप अध्ययन कार्य अघि बढाउनेछ ।