भीम गौतम
सोमवार, भदौ २, २०७६
325

नेपाल विद्युत् प्राधिकरणलाई डिजिटल प्राधिकरण बनाउने घोषणा गरिएको छ । विद्युत् प्राधिकरणको ३४ औ वार्षिकोत्सवको अवसरमा भावी योजना प्रस्तुत गर्दै कार्यकारी निर्देशक कुलमान घिसिङले डिजिटल प्राधिकरण बनाउने घोषणा गरेका हुन् ।
सूचनाप्रविधिको विस्तार र उद्योग स्रोत योजना (इन्टरप्राइजेज रिसोर्स प्लानिङ)को कार्यान्वयन र प्रणालीलाई स्वचालित बनाइ प्राधिकरणको सञ्चालन दक्षता अभिवृद्धि उल्लेख गर्दै कार्यकारी निर्देशक घिसिङले प्राधिकरण क्रमशः डिजिटल प्राधिकरणतर्फ उन्मुख हुने घोषणा गरे । “सरकारको डिजिटल नेपालको अभियानलाई समेत सहयोग पु-याउने गरी डिजिटल प्राधिकरण बनाउने योजना छ,” उनले भने, “प्राधिकरणको कार्यक्रम र योजनाहरू कुशलतापूर्वक कार्यान्वयन गर्न कार्यरत सबै तहका कर्मचारीहरूको सीप तथा दक्षता अभिवृद्धि गर्न प्राधिकरण भित्र र आवश्कताअनुसार विदेशमासमेत उपयुक्त तालिमको व्यवस्था गरिने योजना छ ।”

आगामी दिनहरूमा नियमित, भरपर्दो र गुणस्तरीय विद्युत् सेवा उपलब्ध गराउनु नै प्रमुख चुनौतीको रूपमा रहने यथार्थलाई आत्मसाथ गरी सोहीबमोजिम प्राधिकरणको कार्यक्रम तथा योजनाहरू केन्द्रित गरिने उल्लेख गर्दै उनले प्राधिकरणको पुनःर्संरचनासम्बन्धी योजनाको कार्यान्वयन एवं प्रादेशिक कार्यालय मातहत सम्बन्धित वितरण केन्द्रहरू सञ्चालन गरी चालू वर्षदेखि प्रादेशिक कार्यालयहरूको व्यवसायगत छुट्टाछुट्टै वित्तीय विवरण राख्ने व्यवस्था मिलाइने उल्लेख गरे ।
प्राधिकरणको संस्थागत विकास योजनालाई अन्तिम रूप दिने कार्य भइरहेकोले सो योजनालाई उच्च प्राथमिकताका साथ कार्यान्वयन गरिने र यसबाट आगामी दिनमा प्राधिकरणको कार्य सम्पादनमा अझ गुणात्मक सुधार आउने अपेक्षा गरिएको उनले उल्लेख गरे ।
मुलुकको दीर्घकालिन विद्युत् मागलाई दृष्टिगत गर्दै प्राधिकरणले ‘पिकिङ अर अफ रिभर’ प्रकृतिको १,०६० मेगावाटको अपर अरुण र ६३५ मेगावाटको जलाशययुक्त दुधकोशी जलविद्युत् आयोजनालाई प्राथमिकतामा राखी निर्माण गर्ने प्रक्रिया अगाडि बढाएको पनि उनले जानकारी दिए । नेपाल र भारतबीच विभिन्न अन्तर्देशीय प्रसारणलाइनहरू योजनाबद्ध रूपमा निर्माण गरिने तथा तथा दातृ निकायहरूको सहयोगमा पूर्व–पश्चिम र उत्तर–दक्षिणका चार सय तथा दुई सय केभी प्रसारण सञ्जालको निर्माण सम्पन्न गरिने उल्लेख गर्दै उनले नेपालको रातमाटेदेखि चीनको केरुङसम्मको ४०० के.भी. प्रसारण लाइनको संभाव्यता अध्ययन छिट्टै सम्पन्न हुने र यस प्रसारण लाइनको निर्माणसंगै आगामी दिनमा नेपाल र चीन बीच विद्युत् व्यापारको ढोका खुल्ने बताए ।
नेपाल सरकारको मार्ग निर्देशन अनुरूप प्रत्येक घरधुरीमा सन् २०२३ सम्ममा विद्युत् सेवा पु-याउन देशभरी नै पर्याप्त विद्युत् वितरण सञ्जालको विस्तार योजनाबद्धरूपमा गरिने उनले सहरको सौन्दर्यलाई समेत ध्यानमा राखी काठमाडौं उपत्यकामा प्रारम्भ गरिएको विद्युत् वितरण प्रणाली भूमिगत गर्ने कार्यलाई आगामी दिनमा अन्य शहरमासमेत क्रमिकरूप मा विस्तार गरिने घोषणा समेत गरेका छन् ।
चार्जिङ स्टेशनहरू निर्माण गरी विद्युतीय सवारी साधनको प्रवद्र्धन गर्ने, खाना पकाउने ग्यासलाई विद्युतीय चुल्होले प्रतिस्थापन गर्ने लगायतका कार्यक्रम कार्यान्वयन गरी स्वदेशमा विद्युत्को आन्तरिक खपत वृद्धि गर्नेतर्फ प्राधिकरणले विशेष जोड दिने उल्लेख गर्दै उनले औद्योगिक तथा सहरी क्षेत्रमा बढ्दो विद्युत् माग व्यवस्थापन गर्न प्रसारण तथा वितरण प्रणालीको सुदृढीकरण एवम् विस्तार गर्ने कार्यलाई उच्च प्राथमिकतामा राखिने आफ्नो भावी कार्ययोजनामा उल्लेख गरेका छन् ।