कारोबार संवाददाता
आइतवार, आश्विन १४, २०७५
1289

ऊर्जा क्षेत्रमा सहकार्य गर्न गठित नेपाल र चीनबीचको ऊर्जा संयन्त्रको पहिलो बैठक ऊर्जा क्षेत्रको विकासका लागि संयुक्त रूपमा लगानी गर्न सहमत भएको छ ।
शुक्रबार बसेको संयन्त्रको बैठकले ऊर्जा विकासमा सहकार्यका लागि योजना बनाउने निर्णय गर्दै संयुक्त लगानीका लागि सहजीकरण गर्न सहमति गरेको हो । बैठकले दुवै देशका प्राविधिक सम्मिलित संयुक्त कार्य समूह गठन गरी योजना बनाएर पेस गर्ने सहमति भएको ऊर्जा मन्त्रालयका सहसचिव एवं प्रवक्ता दिनेश घिमिरेले जानकारी दिए । बैठकमा दुवै देशको विद्युत्मा माग र आपूर्तिको अवस्था, भविष्यको प्रक्षेपण र विकास, लगानीको सम्भावनालगायतबारे छलफल भएको थियो । बैठकमा नेपालका तर्फबाट ऊर्जा सचिव अनुपकुमार उपाध्याय र चीनको तर्फबाट इन्टरनेसनल इकोनोमिक डिपार्टमेण्टका उपमहाप्रबन्धक हि याङले नेतृत्व गरेका थिए ।
यसअघिनै प्रधानमन्त्री केपी शर्मा ओलीको चीन भ्रमणका क्रममा गल्छी–रसुवागढी–केरुङ ४०० केभी अन्तरदेशीय प्रसारण लाइन निर्माणका विषयमा भएको सहमतिबारे समेत छलफल भएको थियो । प्रधानमन्त्रीको भ्रमणका क्रममा लगानीका लागि नेपालले प्रस्ताव गरेका नलगाढ, नौमुरे, किमाथांका, सुनकोशी–२ र ३, तमोर र फुकोट कर्णाली जलविद्युत् आयोजनाबारे समेत छलफल भएको थियो ।