कारोबार संवाददाता
सोमवार, जेठ १४, २०७५
1436

अमेरिकी अनुदान सहयोगमा अघि बढाउन लागिएको परियोजना कार्यान्वयनका लागि एमसीए (मिलेनियम च्यालेन्ज एकाउन्ट) नेपाल बोर्ड गठन भएको छ । ऊर्जा र यातायातका परियोजना कार्यान्वयनका लागि स्पेसल पर्पोज भेइकल (एसपीभी) अन्तर्गत गठन हुने एमसीए नेपालको बोर्ड गठन भएको हो ।
अर्थ मन्त्रालयका सचिव पदेन अध्यक्ष हुने बोर्डमा सदस्यको रूपमा वरिष्ठ पत्रकार प्रतीक प्रधान र निजी क्षेत्रको तर्फबाट स्वतन्त्र ऊर्जा उत्पादकहरूको संस्था नेपालका उपाध्यक्ष कुमार पाण्डे तथा वैकल्पिक सदस्यको रूपमा ज्ञानेन्द्रलाल प्रधान र सुरेन्द्र महतोलाई चयन गरिएको छ । प्रधान नागरिक समाज र पाण्डे निजी क्षेत्रबाट चयन भएको अफिस अफ मिलेनियम च्यालेन्ज नेपाल (ओमएमसीएन) का प्रमुख तुलसी सिटौलाले जानकारी दिए । अर्थसचिवसहित ऊर्जा मन्त्रालय, भौतिक पूर्वाधार तथा यातायात मन्त्रालय र नेपाल विद्युत् प्राधिकरणका प्रमुख तथा प्रतिनिधि सदस्यका साथै एमसीए नेपालको कार्यकारी निर्देशक सदस्यसचिव रहने व्यवस्था गरिएको छ । जस अनुसार अर्थ सचिव राजन खनाल अध्यक्ष रहेको समितिमा ऊर्जा, जलस्रोत तथा सिँचाइ मन्त्रालयका सहसचिव दिनेश घिमिरे, भौतिक योजना तथा निर्माण मन्त्रालयका सहसचिव केशव शर्मा र विद्युत् प्राधिकरणका कार्यकारी निर्देशक कुलमान घिसिङ सदस्य छन् । एमसीएको कार्यकारी निर्देशक भने अब खुला प्रतिस्पर्धामार्फत चयन हुनेछन् ।

अमेरिकी सरकारको मिलेनियम च्यालेन्ज कर्पोरेसन (एमसीसी)का उच्च अधिकारीको हालै नेपाल भ्रमणमा प्रधानमन्त्रीदेखि विभिन्न मन्त्री तथा सरकारी उच्च अधिकारीसँगको भेटघाटपछि सन् २०१९ को सेप्टेम्बरदेखि नेपालका प्रशारण लाइन तथा विभिन्न सडक विस्तार सुरु हुने जनाइएको छ । आयोजना सुरु भएको ५ वर्षभित्रै तथा तोकिएको लगानीभन्दा एक सुकाभन्दा पनि बढी खर्च नगरिने समयबद्ध कार्यक्रमको बारेमा एमसीसी अत्यन्त उत्साहित भएको पनि जनाएको छ ।
अमेरिकी सरकारको मिलेनियम च्यालेन्स कर्पोरेसन (एमसीसी)ले दिएको ५० मिलियन डलर अर्थात् ५२ अर्ब रुपैयाँबराबरको अनुदान तथा नेपाल सरकारको १३ अर्ब गरी ६५ अर्ब लागतमा प्रसारणलाइन र सडकहरू मर्मत सम्भार अघि बढ्न लागेको छ । परियोजनाअन्तर्गत लप्सीफेदीदेखि दमौलीसम्मको ३ सय किलोमिटर र दमौलीदेखि नेपाल–भारतको सीमा नजिक सुनवलसम्म २३ किलोमिटर ४ सय केभीको प्रसारण लाइन निर्माण हुन लागेको छ । परियोजनाअन्तर्गत नुवाकोटको गल्छी, तनहुँको दमौली र सुनवलमा सवस्टेशन निर्माण हुनेछ । त्यसैगरी मेची, कोशी र सगरमाथा राजमार्गका साथै पथलैया–भैंसे–भीमफेदी र अमेलिया–तुलसीपुर सडकको मर्मतसम्भार समेत परियोजनामार्फत् अघि बढाउन लागिएको छ । परियोजना ३ सय किलोमिटर सडक छ । परियोजनाको डिजाइनका लागि परामर्शदाता छनोटको कार्य अघि बढेको प्रमुख सिटौलाले जानकारी दिए ।
अबको एक वर्षपछि निर्माण सुरु गरेर पाँच वर्षभित्र परियोजना सम्पन्न गर्ने लक्ष्य छ । निर्माण सुरु भएको पाँच वर्षभित्र पूरा नभएमा खर्च नभएको पैसा स्वतः फिर्ता हुने सम्झौतामा उल्लेख छ । गत सेप्टेम्बर १४ मा अमेरिकामा नेपालको तर्फबाट अर्थमन्त्री ज्ञानेन्द्रबहादुर कार्की र अमेरिकी विदेश उपमन्त्रीले हस्ताक्षर गरेका थिए ।


सातामा धेरै पढिएको