कारोबार संवाददाता
शुक्रवार, माघ १०, २०७६
328

राँझा-बाँकेको जानकी गाउँपालिकाले समयमै काम सम्पन्न नगर्ने दुई ठेकेदार कम्पनीसँगको ठेक्का सम्झौता रद्द गरेको छ । आर्थिक वर्ष २०७४-७५ मा सम्झौता भई हालसम्म काम सम्पन्न हुन नसकेको सम्झौता गाउँसभाबाटै रद्द गर्ने निर्णय भएको गाउँपालिकाका प्रमुख प्रशासकीय अधिकृत हरिबहादुर खत्रीले जानकारी दिए ।
उनका अनुसार गाउँसभाबाट इशा निर्माण सेवा र सुनिता निर्माण सेवासँगको ठेक्का सम्झौता रद्द गर्ने प्रस्ताव पारित गरेको हो । इशा निर्माण सेवाले गाउँपालिकाको वडा नं ६ मा सडक ग्राभेल तथा सुनिता निर्माण सेवाले वडा नं २ मा सडक ढलान तथा नाली निर्माणको ठेक्का सम्झौता गरेका थिए ।

आर्थिक वर्ष २०७४-०७५ मा सम्झौता भएकामा काम सम्पन्न गर्न बारम्बार आग्रह गर्दा पनि अटेर गरेकाले काम सम्पन्न भएको भुक्तानी गरी ठेक्का रद्द गरिएको गाउँपालिकाका योजना शाखा प्रमुख इञ्जिनीयर निसार अहमद दर्जीले बताए ।
गाउँपालिका अध्यक्ष रामनिवास यादवले सुखी नेपाल समृद्ध नेपाल र प्रदेश सरकारको सुखी जनता, समृद्ध प्रदेशको मूल नारालाई आत्मसाथ गर्दै गाउँपालिकावासीको सुखी र समृद्धिका लागि विभिन्न विकास निर्माणका योजनाहरू कार्यान्वयन गर्दै आएको जानकारी दिए ।
गाउँपालिकामा चार दशमलव आठ किलोमिटर पिसीसी ढलान सडक निर्माण, १२ किलोमिटर ग्राभेल, पाँच दशमलव पाँच किलोमिटर नयाँ निर्माण, २०० मिटर कालोपत्र, चार कल्भर्ट, एक दशमलव पाँच किलोमिटर नाला, तीन नयाँ विद्यालय भवन निर्माण र गाउँपालिकाको सभाहल निर्माणलगायतका काम सम्पन्न भइसकेको बताइएको छ ।