कारोबार संवाददाता
बिहिवार, कार्तिक २८, २०७६
273

खानेपानीमन्त्री वीना मगरले अन्तर्राष्ट्रिय बजारमा नेपालमा उत्पादन हुने मिनरल वाटर निर्यात गर्ने योजना बनाउनुपर्ने बताएकी छन् । नेपाल खानेपानी संस्थान काभ्रे पनौतिस्थित प्रशोधित पानी उत्पादन केन्द्र प्लान्टको बुधबार निरीक्षण गर्ने क्रममा उनले नेपालको पानी विदेश निर्यात गर्ने योजना बनाउनुपर्ने बताएकी हुन् ।
प्रशोधित पानी प्लान्ट निरीक्षण गर्दै मन्त्री मगरले बजारमा प्रतिस्पर्धा गरेर संस्थानले गुणस्तरीय पानी आम उपभोक्ता माझ पु-याउने गरी योजना बनाउन निर्देशन दिईन् । संस्थानको यो पहिलो उत्पादन केन्द्र हो । “अन्य स्थानीय तहहरुमा यसरी नै पानी प्रशोधन गर्ने प्लान्ट राख्ने गरी योजना बनाउन जरुरी छ,” उनले भनिन्, “यो एउटा उदाहरण मात्र हो, अन्तर्राष्ट्रिय बजारमा हाम्रा मिनरल वाटर निर्यात गर्न सक्ने गरी योजना बनाउनुपर्छ, संस्थानले काम गर्न सक्छ भन्ने कुरा प्रमाणित गर्न सकोस् ।” संस्थानले आफैं लगानी गरेर प्रशोधित पानी उत्पादन गरी जार तथा बोतलमार्फत आम उपभोक्ता समक्ष पु¥याउने लक्ष्य लिई पनौति नगरपालिका क्षेत्रमा प्लान्टको स्थापना गरेको हो । नेपालका विभिन्न ठाउँहरुमा यस्तै पानी प्रशोधन प्लान्टहरु कहाँ कहाँ राख्न सकिन्छ त्यस बारेमा सम्भावना खोजी गर्न मन्त्री मगरले संस्थानलाई निर्देशन दिएकी छिन् । मन्त्री मगरले संस्थानलाई आफ्नो क्षमता अघि बढाउन निर्देशन समेत दिएकी छिन् । सगरमाथा लगायतका हिमालहरुबाट बग्ने पानीको प्रशोधन गरेर अन्तर्रा्ष्ट्रिय बजारमा बिक्री गर्ने सम्बन्धमा सम्भावनाको खोजी भइरहेको उनले बताएकी छिन् ।

संस्थानका महाप्रबन्धक डा. भुपेन्द्र प्रसादले संस्थान अब खुला बजार प्रतिस्पर्धाका लागि तयार भईसकेको बताए । प्रसादले पनौति जस्तै अन्य नगरपालिकाहरुमा समेत मिनरल वाटर प्लान्ट राख्ने तयारी भइरहेको जानकारी दिए । पनौति नगरपालिकाका नगर प्रमुख मेयर भीम न्यौपानले संस्थानलाई पानीको प्लान्ट क्षमता विस्तार गर्नका लागि आफूहरुले पुरा सहयोग गर्ने प्रतिबद्धता व्यक्त गरेका छन् ।
संस्थानको उक्त प्लान्ट २०७४ भदौदेखि सञ्चालनमा आएको हो । यसको पानी उत्पादन क्षमता प्रति घण्टा २ हजार लिटर रहेको छ । संस्थानले यस प्लान्टबाट दैनिक ३८ हजारदेखि ४० हजार लिटर सम्म पानी उत्पादन गर्न सकिने जनाएको छ । अहिले दैनिक २ सय ६५ जार पानी उत्पादन हुँदै आएकोमा आगामी दिनमा यसको क्षमता विस्तार गरिने महाप्रबन्धक प्रसादको भनाइ छ । उत्पादनसँगै जारको संख्या बढाएर बजारमा प्रतिस्पर्धा गर्ने र बिक्री बढाउने रणनीति संस्थानले लिएको उहाँको भनाइ छ ।