कारोबार संवाददाता
बिहिवार, भदौ १९, २०७६
280

म्याग्दी-बेनी नगरपालिका–७ मंगलाघाटमा जिल्ला निर्वाचन कार्यालय म्याग्दीको भवन निर्माण भएको छ । निर्वाचन आयोगले तीन तले ९ कोठे भवन निर्माण गरेको हो ।
भूकम्प प्रतिरोधी क्षमताको अपांगमैत्री भवन निर्माणको एक करोड ६४ लाख १४ हजार रुपैयाँमा विसं २०७४ असार ४ गते ठेक्का सम्झौता भएको थियो । १८ महिनामा सम्पन्न गर्ने सम्झौता भए पनि आठ महिना थप भएको थियो ।

नयाँ भवनमा कार्यालय स्थापना गरेर सेवा प्रवाह शुरु गरेको जिल्ला निर्वाचन अधिकारी केदारनाथ पौडेलले बताए । भवनमा कार्यालय प्रमुख, प्रशासन, लेखा, सहायता कक्ष, प्रविधि, तालीम हल, स्टोर, अतिथि गृह, आवास र सूचना प्रविधि कक्ष छन् ।
निर्वाचन कार्यालय म्याग्दी स्थापना देखिनै भाडाको घरबाट सञ्चालन हुदै आएको थियो । सुविधा सम्पन्न भवन निर्माण भएपछि कार्यालय सञ्चालन र सेवा प्रवाह सहज भएको निर्वाचन अधिकारी पौडेलले बताए ।
यसैबीच म्याग्दीमा हालसम्म ८१ हजार ४ सय ७७ जनाको तस्बिरसहितको मतदाता नामावली संकलन भएको छ । २०७६ साल साउन सम्म ३९ हजार २ सय ६९ जना पुरुष, ४२ हजार एक सय ७७ जना महिला र एक जना तेस्रो लिङ्गीको तस्बिर सहितको मतदाता नामावली दर्ता भएको छ ।
२०७४ मंसिरमा भएको प्रदेश र प्रतिनिधिसभा सदस्य निर्वाचनमा ३६ हजार एक सय २ पुरुष, ३९ हजार ४ सय ३५ महिला, एक जना तेस्रो लिङ्गीले नामावली दर्ता गराएका थिए । आर्थिक वर्ष २०७५-०७६ मा तीन हजार एक सय ६७ जना पुरुष र दुई हजार ७ सय ४२ जना महिला गरि पाँच हजार नौ सय ९ जना मतदाता थपिएका छन् ।
कार्यालय र जिल्ला प्रशासन कार्यालयमा १६ वर्ष उमेर पुगेका नागरिकको तस्बिर सहितको मतदाता नामावली दर्ता गरिदै आएको छ ।