कारोबार संवाददाता
बुधवार, असार ४, २०७६
476

तिब्बत विकास मञ्चको ल्हासामा सम्पन्न सम्मेलनले तिब्बतको विकास र यसका लागि चीन सरकारले अघि सारेको खुला तिब्बत नीतिमा जोड दिएको छ । विश्वका ३८ देशका प्राध्यापक, वैज्ञानिक, पत्रकार, कूटनीतिक क्षेत्रका जानकार, लेखकलगायतको सहभागितामा भएको सो सम्मेलन ल्हासामा सम्पन्न भएको हो ।
सम्मेलनलाई नेपालका तर्फबाट सम्बोधन गर्दै नेपाल ट्रान्स हिमालयन सोसाइटीका अध्यक्ष प्रा.डा. राजिवकुमार झाले नेपाल–चीन सम्बन्धले विगतको भन्दा थप उचाई हासिल गरेको बताए । उनले भने, “अब नेपाल चीन सम्बन्ध पहिलेको जस्तो परम्परामा मात्र सीमित रहँदैन, दुई देशबीच सम्पन्न यातायात तथा पारवाहन क्षेत्रका सम्झौताले नेपालको विकासमा ठूलो सहयोग पुग्नेछ ।”

उनले नेपाल सदैव एक चीन नीतिको पक्षमा रहेको धारणा राखेपछि त्यहाँ सहभागी चिनियाँ कम्युनिष्ट पार्टीका नेताहरु र सम्मेलनका चिनियाँ प्रतिनिधिले खुशी व्यक्त गरेका थिए । चीनमा विगत २२ वर्षदेखि अध्ययन र अध्यापन गरिरहेका डा. झालाई चीनको सियान सरकारले युवा वैज्ञानिकका रुपमा पुरस्कृत गरेको छ भने उनलाई नेपालको लागि नागरिक दूतका रुपमा पनि घोषणा गरेको छ ।
प्राध्यापक झाले विश्वका करिब एक तिहाइ नागरिकको आस्थाको धरोहर गौतमबुद्धको जन्मस्थल लुम्बिनी नै नेपालमा रहनु नेपालीका लागि सबैभन्दा महत्वपूर्ण कुरा हो भन्दै यस्ता अद्वितीय सम्पदाबाट नेपाल लाभान्वित हुन सक्नुपर्नेमा जोड दिए । उनले तिब्बतको बारेमा बाह्य विश्व र विशेषगरी पश्चिमाहरुले बनाइराखेको सोच गलत रहेको भन्दै तिब्बतको सौन्दर्य, यसको ऐतिहासिकता र अरु विविध क्षेत्रको महत्वलाई संसारमा पु¥याउन हाल चीन सरकारले लिएको नीतिको प्रशंसा गरे ।
उनले नेपाल सरकारले चीनसँगको सम्बन्धलाई थप प्रगढ बनाएको आफूले पाएको भन्दै चीनले नेपालमा निर्माण गरिदिने रेलमार्गले यी दुई देशको सम्बन्धलाई अहिलेसम्मकै सबैभन्दा महत्वपूर्ण स्थानमा पु¥याउने धारणा राखे । सम्मेलनमा विश्वका विभिन्न देशका सहभागीहरुले तिब्बतको बृहत्तर क्षेत्रको महत्वलाई उजागर गर्न चीन सरकारले सुरु गरेको खुला तिब्बत अवधारणाको प्रशंसा गरेका थिए । सम्मेलनलाई चिनियाँ कम्युनिष्ट पार्टीका नेता तथा तिब्बत जनसकारका उपप्रमुखले सम्बोधन गरेका थिए ।
जनवादी गणतन्त्र चीन सरकारको राज्य परिषद् कार्यालयद्वारा आयोजित सम्मेलनमा विश्वका ३८ देशका वैज्ञानिक, पत्रकार, कूटनीतिक क्षेत्रका जानकार एवम् विभिन्न क्षेत्रका व्यक्तित्वहरु गरी ७६ जना सहभागी थिए ।