पाल्पाको ज्यामिरेमा खोरिया फाँडेर जगलैंभरि केराखेती गरिएको छ । निस्दी गाउँपालिका–६ ज्यामिरेका किसानले अहिले जंगलमा लगाएको केराखेतीबाट मनग्य आम्दानी गर्नसमेत सफल भएका छन् ।

पाल्पा जिल्लाको निस्दी गाउँपालिका–६ अर्चलेमा रहेको लेकडाँडाको अहिले पहिचान फेरिन थालेको छ । जताततै वनमासा (वनमारा) ले घेरिएको र गौचरनका रूपमा रहेको डाँडोको पहिचान अब अम्रिसो, टिमुर र दालचिनीले फेरिएको छ ।

सुर्खेतको लेकबेंसी नगरपालिकाले अपांगता भएका व्यक्तिलाई परिचयपत्र वितरण सुरु गरेको छ । अपांगता परिचयपत्र वितरण गर्न स्थानीय तहको अधिकारअन्तर्गत नगरपालिकाले ‘लेकबेंसी नगरपालिका अपांगता परिचयपत्र कार्यविधि २०७६’ निर्माण गरी परिचयपत्र वितरण सुरु गरेको हो । उक्त कार्यविधि जारी गरेसँगै यसै सातादेखि परिचयपत्र वितरण सुरु गरेको छ ।

कर्णाली प्रदेशको जुम्लामा रहेको यातायात व्यवस्था सेवा कार्यालयले साविक कर्णालीमा सवारी चालक अनुमति पत्र वितरण गर्दै आएको थियो । तीन महिनाको अन्तरमा जुम्लामै लाइसेन्स वितरण गर्दा निकै सहज थियो भने, बाँकी पाँच जिल्लाका नागरिकले नेपालगन्ज र अन्य जिल्लामा रहेका यातायात व्यवस्था कार्यालयबाट लाइसेन्ससम्बन्धी काम गर्नुपर्ने बाध्यता थियो ।

घोराही उपमहानगरपालिकालाई वातावरणीय रूपमा प्रदूषण हुनबाट रोक्ने उद्देश्यले उपमहानगरपालिकाले प्लास्टिक खरिद गर्ने भएको छ । जथाभावी रूपमा फोहर फाल्दा सहरमा प्रदूषण बढ्ने र ल्याण्डफिल साइटसमेत भरिने भएकाले घोराही उपमहानगरपालिकाले नगल्ने फोहरका रूपमा रहेका प्लास्टिकजन्य वस्तु खरिद गरेर बिक्री गर्ने तयारी गरेको जनाएको छ ।

प्रदेश ३ का मुख्यमन्त्री डोरमणि पौडेलले अख्तियार दुरुपयोग अनुसन्धान आयोगको कार्यशैलीप्रति असहमति जनाएका छन् । अख्तियारको आतंक देखाउँदै कर्मचारी तथा प्राविधिकले काम नगर्ने प्रवृत्ति बढेको उनले बताए ।

ठेकेदारको चरम लापरवाहीका कारण कर्णाली प्रदेशअन्र्तगतका विभिन्न जिल्ला जोड्ने पक्की पुल निर्माणकै क्रममा अलपत्र परेका छन् । ठेकदारले आधा रकम लिएर सम्पर्कविहीन हुुने, बीचमै काम छोड्ने बजेट अभावको बाहना गर्नेलगायतका कारणले गर्दा कर्णालीमा ६ वटा निर्माणाधीन पक्की पुल अलपत्र अबस्थामा छन् ।

बैतडीको दशरथचन्द नगरपालिका वडा नं ५, ७ र ८ का स्थानीय बासिन्दाले यो वर्ष पनि बर्खेबाली भित्र्याउन नपाएको गुनासो गरेका छन् । बाँदरले खेतमा लगाएको बर्खेबाली सखाप पारेपछि भित्र्याउन नपाएको स्थानीयवासी डम्बर टमाटाले जानकारी दिए । गत पाँच वर्षयता खेतमा लगाएको बाली भित्र्याउन नपाएको उनले गुनासो गरे । बाँदरले सबै बाली सखाप पार्दा खेतमा लगाएको अन्न भित्र्याउन नपाएको स्थानीय लक्ष्मी भट्टले जानकारी दिए ।

तुलसीपुर उप–महानगरपालिका वडा नं १९ छिलीकोटमा कृषकको आगन भरी मालागेडिको बिस्कुन सुकाइएको छ । बजार नपाउँदा कृषकले समयमै मालागेडी बेच्न पाएका छैनन् ।

कारागार जुम्लाका कैदीबन्दी हातमा धागो र सुइडा समातेर बसेका हुन्छन् । कारागारमा दुई महिला र ८६ पुरुषसहित ८८ कैदीबन्दी रहेका छन् । पुरुष कैदीबन्दीले स्विटर र मोजा बनाउने काम गरेका छन् । घरपरिवार र आफ्ना लागि उनीहरूले स्विटर र मोजा बनाउने गरेका हुन् । सजाय भोग्न कारागार आएका उनीहरू सीपयुक्त भएर घर फर्कंदै छन् । अठासी मध्ये झण्डै एक दर्जनभन्दा बढीले स्विटर र मोजा बुन्ने काम गरेका छन् । परिवार भेट्न आउनेलाई उनीहरूले खाली हात फर्काउँदैनन् ।

च्यांग्राका पाठापाठी र पश्मिना उत्पादन गर्न कृषि तथा पशुपक्षी विकास मन्त्रालयले मुस्ताङको लोघेकर दामोदरकुण्ड गाउँपालिका–१ चराङमा च्यांग्रा फार्म सञ्चालनमा ल्याएको छ । स्थानीयस्तरमा गठित फार्म सञ्चालन समितिका अध्यक्ष माया विष्टका अनुसार अहिले फार्ममा ३०० च्यांग्रा रहेका छन् ।

भौतिक पूर्वाधार तथा यातायात मन्त्री वसन्तकुमार नेम्वाङले समयमा सम्पन्न हुन नसकेर रुग्ण अवस्थामा रहेका आयोजनाको पहिचान गरेर काम नसकी अलपत्र पार्नेलाई कारवाही गरिने बताएका छन् । उनले कुनै पनि आयोजना निर्माणको जिम्मेवारी लिने र समयमै काम नसकी अलपत्र पार्नेलाई कारवाही स्वरूप ठेक्का सम्झौता तोडेर नयाँ प्रक्रियाअनुसार काम अघि बढाइने बताए ।

बूढीगण्डकी जलविद्युत् आयोजनाको बजार क्षेत्रको मुआब्जा रकममा असन्तुष्टि जनाउँदै ६ दिनसम्म बन्द रहेको गोरखाको आरुघाट र आर्खेत बजार आइतबारबाट खुलेको छ । वार्तामार्फत उचित निकास निकाल्ने निष्कर्षसहित स्थानीयले ६ दिनदेखि बन्द बजार खुलाएका हुन् । डुवानमा पर्ने बजारक्षेत्रको मुआब्जाबारे सरकारसँग वार्ता गर्न समिति गठन गरिएको छ ।

सप्तरीको छिन्नमस्ता गाउँपालिका–२ स्थित मोहनपुर टोलमा पहिलोपटक बिजुली बत्ती बलेपछि गाउँले खुशी भएका छन् । बिजुली बत्ती बलेपछि लाभान्वित तीन सय घरधुरीमा खुशीयाली छाएको छ ।

प्रदेश निर्वाचन क्षेत्र पूर्वाधार विकास कार्यक्रमअन्तर्गत जिल्लाका ‘क’ र ‘ख’ को बजेट विनियोजन गरेको छ । प्रदेशसभाका २ वटै निर्वाचन क्षेत्रका २ करोड ५० लाखका दरको ५ करोड बजेट विनियोजन गरेको हो ।