पोखराको महेन्द्रपुलमा प्रधान कार्यालय रहेको ओम डेभलपमेन्ट बैंकले राष्ट्रिय किक्रेट खेलाडी करण केसीलाई सम्मान गरेको छ । बैंकका पूर्वकर्मचारीसमेत रहेका केसीले आईसीसी क्रिकेट लिग डिभिजन टुमा उत्कृष्ट प्रदर्शन गर्दै नेपाललाई विश्वकप छनोट खेल चरणमा प्रवेशसँगै डिभिजन वानमा पु¥याउन महत्वपूर्ण योगदान दिएको भन्दै बैंकले उनलाई फूलमाला, तथा खादा र मायाको चिनो प्रदान गर्दै सम्मान गरेको हो ।

स्वदेशी लघुवित्त वित्तीय संस्था लिमिटेडले १ः १ को अनुपातमा साविकका सेयरधनीहरूलाई जारी गर्न लागेको ११ लाख ५० हजार कित्ता हकप्रद सेयर निष्कासन तथा बिक्री प्रबन्धकमा एनआईसी एसिया क्यापिटल लिमिटेड, बबर महल काठमाडौंलाई नियुक्त गरेको छ ।

कुमारी बैंकले आफ्ना ग्राहकहरूलाई स्वदेशमै गुणस्तरीय उपचारमा सहुलियत दिने उद्देश्यले ललितपुरको नख्खुमा रहेको नेपाल मेडिसिटी अस्पतालसँग सम्झौता गरेको छ । उक्त सम्झौतामा कुमारी बैंकका तर्फबाट प्रमुख कार्यकारी अधिकृत सुरेन्द्र भण्डारी तथा नेपाल मेडिसिटी अस्पतालको तर्फबाट प्रमुख कार्यकारी अधिकृत सुधाकर जयरामले हस्ताक्षर गरे ।

सेवा निवृत्त भारतीय सैनिकहरूले पाउने मासिक निवृत्तिभरण भत्ता (पेन्सन) अब स्थानीय बैंकहरूबाट बुझ्न पाउने भएका छन् । पेन्सन बापतको रकम बुझ्न हरेक छ-छ महिनामा पेन्सन क्याम्प धाउन बाध्य भुपू सैनिकले आफ्नौ घरगाउँमा पेन्सन बुुझ्न पाउने भएका हुन् । सरकारले हरेक स्थानीय तहमा बैंक स्थापना गर्ने घोषणासँगै भारतीय सेनाले भूतपूर्व सैनिकहरूलाई स्थानीय तहमा स्थापना हुने बैंकमार्फत पेन्सन बुझ्ने व्यवस्था मिलाउन लागेको भारतीय सेनाका कल्याणकारी कोष हेर्ने प्रमुख लेप्टिनेन्ट जनरल आरपी सिंहले बताए ।

प्रदेश नम्बर ६ मा वित्तीय पहुँच सबैभन्दा कम रहेको देखिएको छ । नेपाल राष्ट्र बैंकले सार्वजनिक गरेको मौद्रिक नीतिको अर्धवार्षिक समीक्षामा प्रदेश नम्बर ६ का ७३ स्थानीय तहमध्ये १७ वटामा मात्र बाणिज्य बैंकले सेवा दिएको उल्लेख छ । सार्वजनिक अर्धवार्षिक समीक्षामा अन्य प्रदेशभन्दा प्रदेश ६ मा कमै मात्र वाणिज्य बैंक पुगेको उल्लेख छ ।

सिटिजनन्स बैंक इन्टरनेसनलले गाउँ–गाउँ पुगेर बैंक खाता र डिम्याट खाता खोल्न थालेको छ । बैंकले माथिल्लो तामाकोसी जलविद्युत् आयोजनाको सेयर प्रयोजनका लागि भन्दै दोलखाका गाउँ–गाउँमा पुगेर बैंक खाता खोल्न थालेको हो ।

फागुन ११ गतेदेखि कर्मचारी सञ्चय कोषका सञ्चयकर्ताहरू, संस्थापक सेयरधनी संस्थाका (नेपाल विद्युत् प्राधिकरण, चिलिमे जलविद्युत् कम्पनी र रसुवा जिल्लाको तत्कालीन जिल्ला विकास समिति तथा गाउँ विकास समितिहरूका कर्मचारीहरू), तथा ऋणदाता (सञ्चयकोष) संस्थाका कर्मचारीहरूका लागि सान्जेन जलविद्युत् कम्पनी तथा रसुवागढी हाइड्रोपावर कम्पनीले जारी गर्न लागेको प्राथमिक सेयर सी–आस्बामार्फत सेयर आवेदन दिन हितग्राही खाता अनिवार्य रहेको हुँदा उक्त साधारण सेयर आवेदन दिन योग्य आवेदकहरूले कुमारी बैंकद्वारा प्रदान गरिएको निःशुल्क हितग्राही खाता कुमारी बैंक लिमिटेडको कुनै पनि शाखा कार्यालयहरूबाट सहज रूपमा खोली यथाशीघ्र लाभ उठाउन आग्रह गरेका छन्

फेदाप र मेन्छ्यायेम गाउँपालिकामा बैंक नहुँदा बैंकिङ कामकाज गर्न सेवाग्राहीलाई समस्या भएको छ । गाउँपालिकाको केन्द्रबाटै सरकारी कामकाज हुँदै आए पनि आर्थिक कारोकारका लागि भने बैंक नहुँदा स्थानीय सेवाग्राहीहरूलाई सास्ती भएको हो । गाउँपालिका स्तरमा सञ्चालन हुने साना तथा ठूला योजनाका बैंक खाता सञ्चालन गर्न, योजनाको भुक्तनी गर्न, शिक्षक तथा अन्य कर्मचारीको तलब भत्तालगायतका सुविधाका लागि समस्या भोग्नु परेको फेदाप गाउँपालिकाका अध्यक्ष हरि चोङबाङले बताए ।

बाग्लुङमा सञ्चालित सहकारी संस्थामध्ये आधाभन्दा बढी करको दायरा बाहिर रहेको पाइएको छ । सरकारले सहकारी संस्था अनिवार्य रूपमा प्यानमा दर्ता हुनुपर्ने व्यवस्था गरे पनि बाग्लुङका २ सय ५१ वटा सहाकारी करको दायर बाहिर रहको पाइएको हो । डिभिजन सहकारी कार्यालय बाग्लुङका अनुसार कार्यालयमा ४ सय ६९ सहकारी संस्था दर्ता छन् । दर्ता भएका सहकारी संस्थामध्ये हालसम्म करदाता सेवा केन्द्रबाट २ सय १८ सहकारीले मात्र प्यान नम्बर लिएका छन् ।

अर्घाखाँची जिल्लाको सदरमुकाममा दजनौ बैंकहरू स्थापना भई कारोबार गरिरहेका छन् । सन्धिखर्कपछिको जिल्लाको दोस्रो बजार क्षेत्र भएको शितगंगा नगरपालिकाको ठाडामा स्थानीय तहको संरचना हुनुभन्दा पहिले नै बैंकहरूको स्थापना भएको थियो ।

नेपाल राष्ट्र बैंकले सबै स्थानीय तहमा बैंकलाई शाखा स्थापना गर्न निर्देशन दिए पनि काभ्रेका विभिन्न स्थानीय तहमा भने अझै पनि बैंक पुगेका छैनन् । ७ गाउँपालिका र ६ नगरपालिका रहेको जिल्लामा भूम्लु गाउँपालिकाबाहेकका अन्य ६ वटा गाउँपालिकामा बैंक स्थापना भएका छैनन् ।

बैंकिङ क्षेत्रमा तरलता अभाव भएको भन्दै बैंक तथा वित्तीय संस्थाले सम्झौताबमोजिम ऋणको पैसा नदिएपछि अधिकांश जलविद्युत् आयोजनामा संकट देखिन थालेको छ । वित्तीय क्षेत्रको निक्षेप–कर्जा अनुपात (सीसीडी रेसियो)मा असर पर्ने कारण देखाउँदै निर्माण सम्पन्न र निर्माणाधीन आयोजनाहरूसँग भएको सम्झौता बमोजिमको ऋण रकम नदिएपछि यस्तो अवस्था सिर्जना भएको हो ।

कुमारी बैंकले ग्राहकको सुबिधालाई ध्यानमा राखी धितोपत्र खरिद गर्न सी–आस्बा सेवा सञ्चालनमा ल्याएको छ । सार्वजनिक निष्कासनमा धितोपत्र खरिद गर्न आवेदन दिँदा अनिवार्य रूपमा सी—आस्बा सेवामार्फत मात्र आवेदन दिन पाउने व्यवस्थालाई मध्यनजर गरी, ग्राहक महानुभावहरूलाई समयमै सी—आस्बा रजिष्ट्रेसन नम्बर प्रदान गर्ने उद्देश्यले बैंकले उक्त सेवा सञ्चालनमा ल्याएको भन्दै बैंकका ग्राहक महानुभावहरूले बैंकको सम्पूर्ण शाखाहरूबाट सहज रूपमा सी–आस्बा रजिष्ट्रेसन नम्बर लिई सी–आस्बा प्रणालीमार्फत धितोपत्र खरिद गर्न आवेदन दिन सक्ने पनि बताएको छ ।

आईएमई जनरल इन्स्योरेन्सले दाङको घोराहीमा बिहीबारदेखि थप शाखा कार्यालय सञ्चालनमा ल्याएको छ । उक्त शाखाको उद्घाटन नेपाल उद्योग वाणिज्य महासंघका उपाध्यक्ष चन्द्रप्रसाद ढकाल, केन्द्रीय सदस्यहरू भरतराज आचार्य तथा धु्रवराज श्रेष्ठ भारीले गरे ।

अहिलेको हिउँदमा माघको अन्तिममा हिउँ परेपछि रारामा हिउँ खेल्ने आन्तरिक पर्यटकसँगै बाह्य पर्यटकको संख्यामा पनि उत्तिकै वृद्धि हुन थालेको छ । माघको अन्तिम तथा फागुनको सुरुमा भारी हिमपात भएपछि रारा पुगेका आन्तरिक तथा बाह्य पर्यटकले रारामा हिउँसँग खेल्न पाउनु निकै खुसीको कुरा भएको बताएका छन् ।