कारोबार संवाददाता
मंगलबार, जेठ ७, २०७६
506

ट्राफिक प्रहरीले सवारी नियम उल्लघंन गर्ने सवारी साधनलाई अनलाइनमार्फत् राजश्व तिर्ने व्यवस्था गर्ने भएको छ । महानगरीय ट्राफिक प्रहरी महाशाखाले सवारी नियम उल्लघंन गरेबापत कारबाहीमा परेका सवारी चालकलाई सजिलोका लागि अनलाइनमार्फत् राजश्व तिर्ने व्यवस्था गर्न लागेको महाशाखाका प्रमुख प्रहरी वरीष्ठ उपरीक्षक वसन्तकुमार पन्तले बताए ।
आइतबार पत्रकार सम्मेलनामा बोल्दै उनले कारवाहीमा परेका चालकको सहजताका लागि साउनदेखि अनलाइनमार्फत् राजश्व तिर्न पाउने व्यवस्था गर्न लागेको जानकारी दिए । उनले उपत्यकाको ट्राफिक व्यवस्थापन गर्दै नमूना राजधानी निर्माण गर्न समयसापेक्ष कानून, प्रविधिको प्रयोग, सडक सञ्जालको व्यवस्थित विस्तार, जनचेतना अभिवृद्धिमा महाशाखाले काम गर्ने जानकारी पनि दिए ।

“हामी सबैको चाहना उपत्यकाको ट्राफिक व्यवस्थापनलाई सुधार गर्दै नमूना राजधानी निर्माण गर्नु हो, सोहीअनुसार महाशाखाले काम गर्दै जानेछ,” उनले भने, “उपत्यकाको ट्राफिक व्यवस्थालाई चुस्तदुरुस्त बनाउन भाडाका सवारी साधनमा ‘ड्रेस कोडका’, सबै चोकमा ट्राफिक लाइट सञ्चालन, ट्राफिक जानकारी सम्बन्धी मोबाइल एप्स, स्मार्ट पार्किङ, नमूना सडक निर्माणका लागि सम्बन्धित निकायसँग समन्वय गरेर अगाडि बढ्न लागेका छौं ।”
यसैगरी उनले महाशाखाले एक वर्षको अवधिमा विभिन्न कसुरमा तीन लाख ८४ हजार २०६ सवारी चालकलाई कारवाही गरेको भन्दै मादक पदार्थ सेवन गरी सवारी साधन चलाउने २६ हजार ४०९, लेन अनुशासन उल्लङ्घन गर्ने ३२ हजार २७, अर्कोको नाममा लाइसेन्स लिन जाने १३, हर्नमा १२ हजार २७१, ह्वील लकमा दुई हजार ८७६, बढी भाडा लिने १० हजार ७८७, सिसिटिभीमा पाँच हजार ६०, सर्भिलेन्स सवारी साधन ९९५, मापसेमा २८ चालकलाई निलम्बन गरेको जानकारी दिए ।
उक्त अवसरमा महाशाखाले चैत २१ गतेदेखि शुरु गरेको तीन महिने उपत्यकाको ट्राफिक व्यवस्थापन तथा प्रदूषण नियन्त्रण कार्ययोजनाअन्तर्गत ११ स्थानमा जेब्राक्रसिङ निर्माण, तीन स्थानमा स्टपलाइन निर्माण, दुई हजार ७५ सवारी प्रदूषण जाँच, पाँच स्थानमा करिडोर निर्माण सम्पन्न गरेको पनि उनले बताए ।