Logo

फेसबुकमा नयाँ प्राइभेसी फिचर

विश्वकै नम्बर एक सामाजिक संजाल कम्पनी फेसबुकले ग्राहकको सुविधाका लागि नयाँ फिचरहरू थप गरेको छ । फेसबुकले थपेको नयाँ फिचरहरूमा कसैले आफ्नो फोटो फेसबुकमा अपलोड गरेमा सम्बन्धित प्रयोगकर्तालाई अलर्ट गर्ने लगायत छन् ।
फेसबुकले प्रयोगमा ल्याएको फेसियल रिकोग्निसन फिचरको सहायताले फेसबुकमा पोस्ट गरिएको कुरा फोटोवालालाई नोटिफिकेसन पठाउँछ । यसअघि पनि अटोमेटिक फोटो ट्याग गर्ने यस्तै खालको फिचर फेसबुकमा छ तर हालको फिचर त्यो भन्दा एडभान्स हो । समा फोटो पोस्ट गर्ने मान्छेले फोटो ट्याग नगर्ने अप्सन रहँदैन । अर्थात् यसअघिको फोटो ट्याग हटाउन मिल्ने फिचर भए पनि अब ट्याग नै नगरी पनि सम्बन्धित फोटो वालालाई जानकारी दिनेछ ।
नयाँ फिचरले कसैले तपाईंको फोटो दुरुपयोग गरिरहको छ भने तुरुन्त त्यसबाट बच्न सहयोगी हुनेछ । यस्तो नोटिफिकेसन हेरेर फोटो ट्याग गर्ने वा नगर्ने भन्ने निर्णय आफ्नो फेसबुक एकाउन्टबाटै दिन सकिन्छ । फोटोसँगै भिडियोमा पनि उपलब्ध यो फिचर उपभोक्ताको मन जित्न सफल हुने विश्वास फेसबुकको छ । फेसबुक फेस रिकोग्निसनको माध्यमबाट उनीहरूको पहिचानलाई व्यवस्थित गर्ने काममा सहयोग गर्दछ । यसले पहिलेदेखि नै ट्याग गरिएका फोटोहरूमा तपाईंको परिचय पत्ता लगाउन पनि सक्छ । साथै यो फिचर तपाईंले आवश्यकता अनुसार अन वा अफ गर्न सक्नुहुनेछ ।
यसअघि पनि फेसबुकले तपाईंलाई कुनै स्टाटस वा फोटो ट्याग गरेमा त्यसलाई तपाईंको वालमा पोस्ट गर्ने वा नगर्ने भन्ने निर्णय दिने ट्याग रिभ्यु फंक्सन पनि थियो । यही फिचरसँग मेल खाने गरी फेसबुकले नयाँ सुविधा थपेको हो । यद्यपि पोस्टिएको फोटोका मान्छे पहिचान गर्ने फेस रिकोग्निसन फिचरको प्रयोग सन् २०१० देखि गरिरहेको छ । तर नयाँ फिचरको मुख्य विशेषता भनेकै यो प्रविधिले तपाईंको फोटो ट्याग नगरिकन अपलोड गर्दछ वा कुनै ग्रुप फोटोमा तपाईं हुनुहुन्छ भने पनि तपाईंलाई नोटिफिकेसन आउनु हो । कम्पनीले छिटै प्रोफाइल फोटो सेफ्टीका लागि पनि फेसियल रिकग्निसन प्रविधिको प्रयोग गर्ने जानकारी दिएको छ ।
यसका लागि तपाईंले आफ्नो फेसबुकको सेटिङमा गएर फेसियल रिकग्निसन अन अफ गर्न सक्नुहुनेछ वा त्यसको लागि फेसबुकको हेल्प सेन्टरमार्फत जानकारी लिन सक्नुहुनेछ । हाल यो फिचर क्यानडा र युरोपियन युनियनबाहेकका सबैजसो देशहरूमा उपलब्ध भएको फेसबुकले जनाएको छ । “हामी चाहन्छौं प्रयोगकर्ताले जतिबेला फेसबुकमा आफ्ना फोटोहरू पोस्ट गर्दछन्, त्यसबेला उनीहरू त्यसको गलत प्रयोग नभएकोमा विश्वस्त हुन सकून्,” फेसबुकले यस विषयमा जानकारी दिंदै भनेको छ ।
यसका साथै फेसबुकमा साथीहरूको अनलाइन स्टाटस फिचर पनि सुधारिएको छ । यसअघि कुनै साथी अनलाइन भएको विषयमा ऊसँगको च्याटबक्स खोलेपछि मात्र थाहा हुन्थ्यो भने थपिएको नयाँ फिचरअनुसार साथीहरूको सूचीमै यस्तो स्टाटस थाहा हुन्छ । लिस्टमा भएको कुन साथी कति समयअघि अनलाइन थियो भन्ने कुरा साथीको प्रोफाइल फोटोकै तल्लो कुनामा सानो अक्षरले मिनेट लेखेको पाइनेछ । यी सहित थप फिचरका लागि फेसबुकको एप भने अपडेट गर्न जरुरी हुन्छ ।

 

प्रतिक्रिया दिनुहोस्