१८ करोड राजस्व संकलन, ९९ करोड बजेट फ्रिज «

१८ करोड राजस्व संकलन, ९९ करोड बजेट फ्रिज

विभिन्न सरकारी कार्यालयमा अख्तियारी प्राप्त बजेटमध्ये ९९ करोड ३१ लाख ४ हजार
८ सय ४७ रुपैयाँ फ्रिज भएको छ ।

रामेछाप-गत आर्थिक वर्ष २०७४-७५ मा रामेछापका विभिन्न कार्यालयबाट १७ करोड ९७ लाख ५५ हजार ४ सय ४० रुपैयाँ राजस्व संकलन भएको छ । जिल्ला प्रशासन कार्यालयबाट मात्रै राहदानी दस्तुर, धरौटी, प्रशासनिक दण्ड जरीवाना, संस्था र हातहतियार नवीकरणवापत १ करोड ४१ लाख ८ हजार २ सय ८२ रुपैयाँ संकलन भएको छ । विभिन्न सरकारी, गैरसरकारी र निजी कम्पनीमार्फत सो रकम संकलन भएको प्रमुख कोष नियन्त्रक यमुना प्रधानले जानकारी दिइन् ।
कोष तथा लेखा नियन्त्रण कार्यालय रामेछापका अनुसार जिल्लाका विभिन्न सरकारी कार्यालयमा अख्तियारी प्राप्त बजेटमध्ये ९९ करोड ३१ लाख ४ हजार ८ सय ४७ रुपैयाँ फ्रिज भएको छ । जसअन्तर्गत चालूतर्फ अख्तियारी प्राप्त ११ अर्ब ४१ करोड ९२ लाख ६४ हजार ५ सय ७६ मध्ये १० अर्ब ८९ करोड ५१ लाख ६९ हजार ९ सय ७६ रुपैयाँ खर्च भई ५२ करोड ४० लाख ९४ हजार ५ सय ९९ रुपैयाँ फ्रिज भएको हो ।
त्यसैगरी पुँजीगतअन्तर्गत २ अर्ब १५ करोड ८८ लाख ३१ हजार अख्तियारी प्राप्त रकम मध्ये १ अर्ब ६८ करोड ९८ लाख २० हजार ७ सय ५२ रुपैयाँ खर्च भई ४६ करोड ९० लाख १० हजार २ सय ४७ रुपैयाँ फ्रिज भएको छ ।
जिल्लामा अख्तियारी प्राप्त चालू र पुँजीगत मध्येको कुल रकम १३ अर्ब ५७ करोड ८० लाख ९५ हजार ५ सय ७६ रुपैयाँ मध्ये १२ अर्ब ५८ करोड ४९ लाख ९० हजार ७ सय २८ रुपैयाँ खर्च भई ९९ करोड ३१ लख ४ हजार ८ सय ४७ रुपैयाँ फ्रिज भएको हो ।
संघीय संरचनाअनुसार गठन भएका स्थानीय तहको भूमीका र जिम्मेवारीसँगै जिल्लाका सरकारी कार्यालयलाई कसले कार्यक्रम गर्ने भन्ने अन्योलतासँगै पर्याप्त बजेट खर्च हुन नसकी धेरै रकम फ्रिज भएको नागरिक सञ्जालका संयोजक रामचन्द्र वियोगीले बताए ।
जिल्लाका धेरै कार्यालय चैत मसान्तबाटै बहिर्गमन हुने सम्बन्धित तालुकी कार्यालयको पहिलो परिपत्र र पुनः असार मसान्तसम्म कार्यालय रहने आसयको दोस्रो परिपत्रअनुसार पनि अख्तियारी प्राप्त भएको बजेट खर्च हुन नसकेको सुशासनकर्मी उमंग मैनालीले बताए ।

रमेश ढुंगेल

प्रतिक्रिया दिनुहोस्