ट्रम्पको राष्ट्रपतीय निर्वाचन अभियानद्वारा थप राष्ट्रपतीय बहसको कार्यतालिका ल्याउन माग «

ट्रम्पको राष्ट्रपतीय निर्वाचन अभियानद्वारा थप राष्ट्रपतीय बहसको कार्यतालिका ल्याउन माग

वासिङटन-राष्ट्रपतीय निर्वाचन आयोगले निर्धारण गरेको बहस कार्यतालिकालाई थप्न र बहस कार्यक्रम सेप्टेम्बरको सुरूदेखि नै सञ्चालन गर्न अमेरिकी राष्ट्रपति डोनाल्ड ट्रम्पको पुनः निर्वाचन अभियानले माग गरेको छ ।
राष्ट्रपति तथा रिपब्लिक पार्टीका नेता ट्रम्पका निजी वकीलले आयोगलाई लेखेको पत्रमा उक्त माग गरिएको हो ।
ट्रम्पका कानूनी सहयोगी तथा न्यूयोर्कका पूर्व नगरप्रमुख रूडोल्फ गिलानीले आयोगलाई लेखेको पत्रमा राष्ट्रपतीय बहसलाई तीनको सट्टा चार बनाउन र थप बहस सेप्टेम्बरको सुरूमा हुनेगरी प्रबन्ध गर्न आग्रह गरिएको हो ।
आयोगले पुरानै प्रचलन अनुसार सेप्टेम्बर २९ मा ओहायो, अक्टोबर १५ मा फ्लोरिडा र अक्टोबर २२ मा टेनिसी गरी तीनवटा बहसका कार्यक्रम सार्वजनिक गरेको थियो ।
गिलानीले पहिलो बहस प्रारम्भ हुँदै गर्दा अमेरिकी १६ राज्यहरूका दशौँ लाख नागरिकहरूले मतदान गरिसकेका हुने भन्दै बहसको मिति अगाडि सार्न र कार्यक्रम थप गर्न आग्रह गरेका हुन् ।
गिलानीले भने, “कोभिड–१९ को विश्वव्यापी महामारीको कारण परम्परागत अभियान तालिकाबाट वञ्चित राष्ट्रका लागि लाखौँ अमेरिकीहरूले लाखौं मतदान गर्नुअघि देशको भविष्यका लागि मैदानमा रहेका दुई प्रतिस्पर्धीहरूलाई बहसमा सुन्न पाउने अवसरबाट पनि वञ्चित गर्नु कुनै अर्थपूर्ण छैन ।”
उनले सेप्टेम्बर ४ मा उत्तर क्यारोलिनामा पहिलो मतपत्र पठाउनु भन्दा पहिले सेप्टेम्बरको सुरुमा बहस थप्नुलाई उत्तम समाधान भएको बताए । यदि आयोगले थप बहस गर्न अस्वीकार गरेमा अन्तिम चरणको बहसलाई सेप्टेम्बरको पहिलो सातामा सार्नुपर्ने उनको तर्क थियो ।
पूर्व उपराष्ट्रपति तथा डेमोत्र्mयाटिक पार्टीको तर्फबाट उम्मेद्वार जो बाइडेनको अभियानका प्रवक्ता एन्ड्र्यू बेट्सले एक विज्ञप्तिमा जारी गरी वाइडेनले बहसको कार्यक्रमलाई स्वीकार गरिसकेको बेलायती समाचार संस्था रोयटर्सले लेखेको छ ।
बेट्सले भने, “जो बाइडेन त्यहाँ हुनुहुनेछ । हामी डोनाल्ड ट्रम्पको निर्णयको पर्खाइमा छौ र सम्भवतः राष्ट्रपतिले निर्वाचनको तयारीका लागि दिएजति यथेष्ट समय कोभिड–१९ को व्यवस्थापनमा पनि खर्च गर्नुपर्छ ।”

प्रतिक्रिया दिनुहोस्