निगमको वाइडबडी जेठ तेस्रो साता

नेपाल वायुसेवा निगमले खरिद गर्न लागेको एयरबस ३३०–२०० सिरिजको वाइडबडी जहाज निर्माता कम्पनीले जेठको तेस्रो सातामात्रै नेपाललाई हस्तान्तरण गर्ने भएको छ । एयरबसले २०१८ को जुन पहिलो साता पहिलो जहाज हस्तान्तरण गर्नेगरी कार्यतालिका पठाएको निगमले जनाएको छ । निगमका अनुसार दोस्रो थान जहाज भने पहिलो जहाज त्रिभुवन अन्तर्राष्ट्रिय विमानस्थलमा अवतरण गरेको एक महिनापछि नेपाल आउनेगरी कार्यतालिका पठाएको छ । जसमा दोस्रो जहाज असार तेस्रो साता नेपाल आउने छ । यसअघि निगमले वैशाखको अन्तिम साता नेपाल आउने जनाउँदै आएको थियो ।
२ सय ७४ सिट क्षमताका जहाज निगमले आयरल्यान्डको हाइफ्लाई एक्स लिजिङ कम्पनीमार्फत खरिद गर्न लागेको हो । निगमको पाँच सदस्यीय प्राविधिक टोली जहाज परीक्षणका लागि यसै साता फ्रान्स जाँदैछ । निगमलले दुई थान जहाज २० करोड ८० लाख १६ हजार डलर अर्थात २२ अर्ब ६३ करोड रुपैयाँमा खरिद गर्दैछ । जसमा पहिलो किस्ताबापत ७९ मिलियन डलर अर्थात झन्डै ८ अर्ब रूपैयाँ पठाइसकेको छ ।
निगमले सञ्चय कोष र नागरिक लगानी कोषसँग १२-१२ अर्ब रुपैयाँ ऋण लिएर दुई थान एयरबस ३३०–२०० सिरिजको जहाज खरिदका लागि स्रोत जुटाएको थियो । निगमले बाँकी रकम १४ अर्ब ६३ करोड रुपैयाँ दोस्रो किस्ताबापत जहाज आउनुभन्दा केही अगाडि पठाउने छ । निगमले यो जहाजबाट दक्षिण कोरिया, जापान, अष्ट्रेलिया लन्डनजस्ता गन्तव्यमा उडान गर्ने योजना बनाएको छ । निगमले पहिलो चरणमा जापानको ओशाका विमानस्थल र दक्षिण कोरियाको सोलमा उडान गर्ने भएको छ । जापानले हालै नेपाललाई हवाई सम्झौताको लागि बोलाइसकेको छ ।