लकडाउनले बढायो महँगी «

लकडाउनले बढायो महँगी

चालू आर्थिक वर्षको चैत महिनामा बजारमा महँगी बढेको अध्ययनमा पाइएको छ । कोरोनाभाइरस संक्रमण नियन्त्रणका लागि सरकारले चैत ११ गतेदेखि लकडाउन गरेको कारणले गर्दा मूल्यवृद्धि केही बढेको नेपाल राष्ट्र बैंकले जनाएको छ ।
२०७६ चैतमा वार्षिक बिन्दुगत उपभोक्ता मुद्रास्फीति ६.७४ प्रतिशत रहेको छ । यो मूल्यवृद्धि फागुन महिनाको तुलनामा ०.१७ प्रतिशतले बढेको हो । चैत महिनामा लकडाउनका कारण दैनिक उपभोग्य बस्तुको मूल्यमा केही वृद्धि भएको हो । गत आर्थिक वर्षको सोही महिनामा मुद्रास्फीति ४.४३ प्रतिशत रहेको थियो ।
चालू आवको चैतमा खाद्य तथा पेय पदार्थ समूहको मुद्रास्फीति ९.६९ प्रतिशत र गैरखाद्य तथा सेवा समूहको मुद्रास्फीति ४.४८ प्रतिशत रहेको केन्द्रीय बैंकले जनाएको छ । आर्थिक वर्ष २०७६-७७ को नौ महिनासम्म औसत मुद्रास्फीति ६.५ प्रतिशत रहेको छ । गत अघिल्लो आर्थिक वर्षको सोही अवधिमा यस्तो मुद्रास्फीति ४.२ प्रतिशत रहेको थियो ।
२०७६ फागुनमा वार्षिक बिन्दुगत थोक मुद्रास्फीति ६.५७ प्रतिशत रहेको छ । अघिल्लो वर्षको सोही महिनामा यस्तो मुद्रास्फीति ४.९७ प्रतिशत रहेको थियो । २०७६ फागुनमा वार्षिक बिन्दुगत तलब तथा ज्यालादर सूचकांक ७.५१ प्रतिशतले बढेको छ । गत आर्थिक वर्षको सोही महिनामा उक्त सूचकांक १०.०१ प्रतिशतले वढेको थियो । फागुन महिनामा तलब सूचकांक १३.५५ प्रतिशत र ज्यालादर सूचकांक ५.८९ प्रतिशतले वृद्धि भएको छ ।
केन्द्रीय बैंकले कोरोनाका कारण असर परेको साना तथा मझौला उद्योग व्यवसाय र पर्यटन क्षेत्रलाइ उकास्न विशेष प्राथमिकता दिने जनाएको छ । कोरोनाभाइरसका कारण अत्यधिक प्रभाव परेको पर्यटन, साना तथा मझौला उद्योग व्यवसाय चालू आर्थिक वर्षको चौथो त्रयमासमा भुक्तानी गर्नुपर्ने ब्याजमा सहुलियत प्रदान गर्न आवश्यक व्यवस्था मिलाउने समेत केन्द्रीय बैंकले जनाएको छ । कोभिड–१९ बाट बढी प्रभावित क्षेत्रलाई चालू पुँजी कर्जा प्रदान गर्ने व्यवस्थालाई थप सहज बनाउन आवश्यक व्यवस्था पनि गर्ने केन्द्रीय बैंकले जनाएको छ ।
साना तथा मझौला उद्योग, पर्यटन र कोभिड–१९ को प्रभाव अत्यधिक परेका क्षेत्रमा प्रादेशिक सन्तुलनसमेत कायम हुनेगरी यस बैंकबाट प्रदान गरिने पुनर्कर्जा सहज ढंगले प्रवाह गर्न पुनरकर्जा कार्यविधिमा संशोधन गर्ने भएको छ । हाल ६० अर्ब रुपैयाँ बरावरको पुनरकर्जा कोषलाई आवश्यकता अनुसार क्रमशः वृद्धि गर्दै लैजाने व्यवस्था समेत बैंकले जनाएको छ । बैंकिङ क्षेत्रबाट हुने कर्जा प्रवाहले थप सहजीकरण गर्न आवश्यक उपायहरू अवलम्वन गरिने केन्द्रीय बैंकले जनाएको छ ।
कोभिड–१९ बाट वढी प्रभावित भएका क्षेत्रमा प्रवाह भएको कर्जालाई पुनरतालिकीकरण वा पुनर्संरचना गर्न सकिने सुविधा प्रदान गर्न आवश्यक व्यवस्था मिलाइने तथा डाउनको अवधिमा भुक्तानी गर्नुपर्ने कर्जाको भुक्तानी अवधि थप गर्न सकिने व्यवस्था गर्ने केन्द्रीय बैंकले जानकारी दिएको छ ।

प्रतिक्रिया दिनुहोस्