वैज्ञानिकहरू कोरोना भाइरसको खोप बनाउन सक्रिय «

वैज्ञानिकहरू कोरोना भाइरसको खोप बनाउन सक्रिय

सिंगापुर-संयुक्त राज्य अमेरिकादेखि अस्ट्रेलियासम्मका वैज्ञानिकहरू चीनको कोरोना भाइरसको प्रकोप साम्य बनाउने उद्देश्यले महत्वाकांक्षी, करोडौं डलरको अभियानका साथ खोप विकास गर्न नयाँ प्रविधि प्रयोग गरिरहेका छन् ।
गत वर्षको अन्त्यतिरबाट चीनमा देखिएको यो नयाँ भाइरस द्रुत गतिमा फैलिएको छ, र चीनको मुख्य भूमिमै ९ सय जनाभन्दा बढी मानिसको मृत्यु भइसकेको छ । भाइरसबाट ४० हजारभन्दा बढी मानिस संक्रमित छन् । दुई दर्जन अन्य देशमा कोरोना प्रभावित व्यक्ति भेटिएका छन् ।
कुनै पनि खोप बनाउन सामान्यतया वर्षौं लाग्छ र पशुहरूमा परीक्षणको लामो प्रक्रियाका साथै मानवमा परीक्षण र नियामक स्वीकृति आवश्यक हुन्छ ।
तर विशेषज्ञहरूका धेरै टोली द्रुत प्रक्रियाबाट खोप निर्माण गर्ने दौडमा जुटेका छन्, जसलाई अन्तर्राष्ट्रिय वैज्ञानिकहरूको समर्थन प्रान्त हुने विश्वास छ । अस्ट्रेलियाली वैज्ञानिकहरू ६ महिनाभित्रमा कोरोना भाइरसको खोप तयार गर्ने आशामा छन् ।
“अहिले साँच्चिकै दबाबको स्थिति छ र हाम्रो काँधमा ठूलो जिम्मेवारी छ,” अस्ट्रेलियाको क्विन्सल्यान्ड विश्वविद्यालयका एक जना वरिष्ठ अनुसन्धानकर्ता किथ च्यापेलले बताए ।
तर उनले विश्वका धेरै टोली एउटै अभियानमा जुटिसकेकाले आफूलाई खुसी लागेको बताए ।
“आशा छ, यीमध्ये कुनै न कुनै एक सफल हुनेछ र यो प्रकोप साम्य हुनेछ,” उनले बताए । तर ६ महिनाको समयावधि पनि कोरोनाको संक्रमणका दृष्टिकोणबाट कष्टदायी र ढिलो देखिएको छ । जंगली जनावरहरू बेचबिखन गर्ने बजारबाट फैलिएको आशंका गरिएको कोरोना भाइरसका कारण चीनको मुख्य भूमिमा दैनिक १ सय जनाको ज्यान गइरहेको छ ।
पश्चिम अफ्रिकामा करिब ११ हजारको ज्यान लिएको इबोला प्रकोप नियन्त्रणका लागि खोप निर्माण गर्न आर्थिक सहयोग जुटाउनका लागि सन् २०१७ मा गठन भएको कोएलिसन फर इपिडेमिक प्रिपर्डनेस इनोभेसन्स (सेपी) पनि यसपटक कोरोना भाइरसको खोप निर्माणमा सक्रियतापूर्वक जुटेको छ । निकै महँगो बायोटेक्नोलोजी अनुसन्धानका लागि यस संस्थाले वित्तीय सहायता जुटाउँछ ।
खोपको विकासको गति बढाउने लक्ष्यसहित सेपीले विश्वभरि चारवटा परियोजनामा करोडौं अमेरिकी डलर लगानी गरिसकेको छ र थप प्रस्तावका लागि आह्वान गरिरहेको छ ।
यी परियोजनाहरूबाट नयाँ प्रविधि प्रयोग गरी निर्माण गरिने खोपहरू निकट भविष्यमा परीक्षण गर्न सकिने विश्वास लिइएको छ । सेपीका प्रमुख कार्यकारी अधिकृत रिचर्ड ह्यासेटले १६ हप्ताभित्रै खोपको क्लिनिकल परीक्षण सुरु गर्ने लक्ष्य राखिएको बताए ।
जर्मन बायोफर्मास्युटिकल कम्पनी क्युरभ्याक र अमेरिकी मोडर्ना थेराप्यूटिक्सले मेसेन्जर–आरएनए (प्रोटिन उत्पादन गर्न शरीरलाई निर्देशन दिने औषधि) मा आधारित खोपहरु विकास गर्दैछन् । अर्को अमेरिकी कम्पनी इनोभियोले डीएनए–आधारित प्रविधि प्रयोग गरिरहेको छ ।

प्रतिक्रिया दिनुहोस्