गण्डक पश्चिमी नहर सिँचाइ आयोजनाको सेटलिंग बेसिन उद्घाटन

नवलपरासी- उर्जामन्त्री दीपक खड्काले नेपाल गण्डक पश्चिमी नहर सिँचाइ आयोजनाको सेटलिंग बेसिन उद्घाटन गरेका छन् । सोमबार नवलपरासीको सेमरीमा एक कार्यक्रमका बीच उर्जामन्त्री खड्का र सांसद विनोद चौधरीले संयुक्त रुपमा सेटिलिंग बेसिनको उद्घाटन गरेका हुन् । अब यो नहर पूर्ण क्षमतामा सञ्चालनमा आएको छ ।

२०३९ सालमा निर्माण भएको नहरको सिँचाइ क्षमता ८ हजार ७ सय हेक्टर क्षेत्रफल भए पनि मुहानमै बालुवा थुप्रिने समस्याका कारण २० प्रतिशत क्षमतामा मात्रै सिचाई हुँदै आएको थियो । २०७९ सालमा प्रतिनिधिसभा सदस्य निर्वाचित भएपछि चौधरीले नहरलाई पूर्ण क्षमतामा सञ्चालन गर्न पहल गर्दै आएका थिए । यो नहर सांसद चौधरीको निर्वाचन क्षेत्रमा पर्दछ ।

पश्चिम नवलपरासी–१ बाट निर्वाचित सांसद चौधरीले अब साविक भन्दा नहरबाट पाँच गुणा बढि भूमिमा सिंचाई सुविधा उपलब्ध हुने भएपछि किसान लाभान्वित हुने बताए । ‘नेपाली नहर पूर्ण सञ्चालनमा आउने व्यवस्था मिलाएपछि नवलपरासीका किसानको मुहारमा भरिएको खुसी देख्न पाउँदा मलाई अत्यन्तै सन्तुष्टि मिलेको छ,’ उनले भने, ‘यहाँका नागरिकले ३५ वर्ष सिचाईँका लागि जुन संघर्ष गर्नुपरेको थियो, तपाईहरुको पिडासँग जोडिएको त्यो वेदनालाई अब सम्बोधन गरेको छ । यो पर्याप्त छैन । हामीले अझै धेरै गर्नुछ ।’

किसानका समस्याप्रति आफू सँधै सम्वेदनशिल रहेको र भविष्यमा किसानका लागि प्रभावकारी परियोजनाहरू नवलपरासीले पाउने पनि चौधरीले बताए । सांसद चौधरीले हरेक वर्ष वर्षायाममा हुने डुवान र कटानको समस्याबाट यो क्षेत्र अत्यन्तै प्रभावित भएकाले यसको दीर्घकालीन समाधानका लागि उर्जामन्त्रीको ध्यानाकर्षण गराए । उनले ६५ वर्षअघि नेपाल–भारतबीचको ऐतिहासिक सम्झौता भएको गण्डक परियोजनाका बारेमा भारतीय पक्षसँग गम्भीर रुपमा संवाद गर्नुपर्ने खाँचो औंल्याए ।

सोमबार उद्घाटन गरिएको नेपाल गण्डक पश्चिमी नहरको सेटलिंग बेसिन ३५ करोड लागतको परियोजनामा अढाई वर्षमा सम्पन्न भएको हो । सेटलिंग बेसिन निर्माणपछि अब नहरमा बालुवा जान रोकिनेछ । मन्त्री खड्काले पश्चिम नवलपरासीका नागरिकले भोगेको डुवान र सिचाइको समस्या समाधानका लागि आफू प्रतिवद्ध रहेको बताए । पश्चिम नवलपरासीमा आफू दोस्रो पटक आएको र यहाँका समस्यासँग जानकार रहेको उल्लेख गर्दै मन्त्री खड्काले सांसद चौधरीजस्तो राष्ट्रिय अन्तर्राष्ट्रियस्तरमा स्थापित व्यक्ति यो क्षेत्रले पाउनु गौरवको विषय रहेको बताए ।