बराहपोखरीका ४१ वटा योजना सम्पन्न

खोटाङ- खोटाङको बराहपोखरी गाउँपालिकामा यस आर्थिक वर्षमा ६७ वटा योजना सम्झौता गरिएकामा ४१ वटा योजना सम्पन्न भएका छन् ।

गाउँपालिकाले आयोजना गरेको सार्वजनिक सुनुवाइ कार्यक्रममा दिइएको जानकारीअनुसार सम्झौता गरिएकामध्ये २६ वटा योजना सम्पन्न हुन बाँकी छन् । गाउँपालिकाले चालु आर्थिक वर्षको कूल बजेटमध्ये ५८.५७ प्रतिशत खर्च गरेको लेखा अधिकृत छत्रबहादुर बानियाँले जानकारी दिए । लेखा अधिकृत बानियाँका अनुसार चालुतर्फ ६३.६४ र पुँजीगततर्फ ४७.९४ प्रतिशत बजेट खर्च गरेको हो ।

चालु आर्थिक वर्षका लागि गाउँपालिकाको बजेट ३२ करोड ९२ लाख ३५ हजार छ । संघीय समानीकरणतर्फ पाँच करोड ४६ लाख ७० हजारमध्ये हालसम्म चार करोड ४५ लाख ७५ हजार खर्च भएको छ । सशर्त अनुदानतर्फ १३ करोड ३८ लाख ४९ हजार प्रक्षेपण गरिएकोमा १० करोड चार लाख चार हजार आम्दानी हुँदा नौ करोड २० लाख ९५ हजार खर्च भएको छ ।

गाउँपालिकामा बिहीबार सम्पन्न सार्वजनिक सुनुवाइ कार्यक्रममा स्थानीयवासीले गाउँपालिकाबाट सम्पादित योजनामाथि जिज्ञासा राखेका थिए । उनीहरुले गाउँपालिकाबाट सम्पादन हुने कार्यक्रम जनमुखी बनाउँदै गुणस्तरमा ध्यान दिन सुझाव दिए । गाउँपालिका प्रमुख शालिकराम बञ्जरा, उपप्रमुख भूबलराज राई, प्रमुख प्रशासकीय अधिकृत दिलकुमार अधिकारीलगायतले जिज्ञासाको जवाफ दिएका थिए ।